पश्चिम महाराष्ट्रात मुसळधार पावसाने थैमान घातले असून दौंड, बारामती, इंदापूर परिसरात ढगफुटी सदृश परिस्थिती निर्माण झाली आहे. विशेषतः बारामती आणि दौंडमध्ये रविवारी एकाच दिवसात अर्धा वर्षभराचा पाऊस पडल्याने नागरिकांमध्ये भीतीचं वातावरण पसरलं आहे. यात नीरा डावा कालवा फुटल्याने काटेवाडी, कान्हेरी, पिंपळी, भवानीनगर परिसरात पाणी घरात घुसल्याने नागरिकांची मोठी तारांबळ उडाली आहे.
कालवा फुटल्यामुळे अनेक रस्ते, महामार्ग जलमय झाले असून काटेवाडी-भवानीनगर रस्ता बंद करण्यात आला आहे. पिंपळी परिसरात कालवा फुटल्याने शेतात आणि घरात पाणी शिरले, त्यामुळे शेतीचे प्रचंड नुकसान झाले आहे. पालखी मार्गावरही पूरसदृश परिस्थिती असून वाहतूक बंद करण्यात आली आहे.
दौंड तालुक्यातही पुणे-सोलापूर महामार्गावर पाणी साचल्यामुळे वाहतूक ठप्प झाली असून एका इनोव्हा कारला पाण्याचा प्रवाह घेऊन गेला. सुदैवाने कोणतीही जीवितहानी झाली नाही.
याठिकाणी एनडीआरएफच्या दोन टीम्स तातडीने दाखल करण्यात आल्या आहेत. त्यांनी पूरग्रस्त भागात अडकलेल्या नागरिकांना सुरक्षितस्थळी हलवले आहे. स्थानिक पोलिस, महसूल आणि अग्निशमन विभागाच्या टीम्स सतत बचावकार्य करत आहेत.
पावसाच्या पार्श्वभूमीवर उपमुख्यमंत्री अजित पवार यांनी स्वतः पहाटेच घटनास्थळी भेट देऊन पाहणी केली. पुणे जिल्हाधिकारी, पीएमआरडीए आणि इतर प्रशासकीय अधिकाऱ्यांना त्यांनी योग्य त्या सूचना दिल्या असून तातडीच्या उपाययोजनांवर भर दिला आहे.
अजित पवारांनी माध्यमांशी बोलताना सांगितले की, “बारामतीत वर्षभरात सरासरी 14 इंच पाऊस होतो. त्यापैकी तब्बल 7 इंच पाऊस एकाच दिवसात पडल्याने ही गंभीर परिस्थिती निर्माण झाली आहे. प्रशासनाने त्वरेने मदत व बचावकार्य राबवावे.”
तसेच त्यांनी काटेवाडी व कान्हेरी परिसरात जाऊन नागरिकांची भेट घेऊन त्यांची परिस्थिती जाणून घेतली. पूरग्रस्त कुटुंबांना तात्काळ निवारा, अन्नधान्य आणि वैद्यकीय मदत पुरविण्याचे आदेश त्यांनी दिले आहेत.
