चिखलीतील लेबर कॅम्पमधील बेकायदा देशी दारू अड्ड्यावर पोलिसांचा धाडसत्र – आ. महेश लांडगेंच्या सूचनेनंतर कारवाई; रहिवाशांना मिळाला दिलासा

चिखली परिसरातील शांतता भंग करणाऱ्या लेबर कॅम्पमधील बेकायदा देशी दारू अड्ड्यावर अखेर कारवाई झाली असून, या ठिकाणी पोलिसांनी धाड टाकून संपूर्ण अड्डा उध्वस्त केला आहे. विशेष म्हणजे या कारवाईमागे भाजप आमदार महेश लांडगे यांची तत्काळ प्रतिक्रिया आणि पोलिस प्रशासनाला दिलेली सूचना कारणीभूत ठरली आहे. या कारवाईमुळे आजूबाजूच्या रहिवाशांना मोठा दिलासा मिळाला असून त्यांनी आमदार लांडगे यांचे आभार मानले आहेत.

चिखलीतील हॅरिझन आणि लेगसी रिव्हरसाईड सोसायट्यांच्या मागे असलेल्या या लेबर कॅम्पमध्ये सुमारे ३ हजार मजूर राहतात. येथे गेल्या काही महिन्यांपासून देशी दारूचे बेकायदेशीर दुकान चालवले जात होते. या दारू अड्ड्यामुळे सतत वादविवाद, गोंधळ, महिलांवरील अश्लील कमेंट्स, आणि दगडफेकसारखे प्रकार घडत होते. त्यामुळे महिलांमध्ये भीतीचे वातावरण निर्माण झाले होते. लहान मुलं आणि ज्येष्ठ नागरिक यांचा देखील सुरक्षिततेवर परिणाम होत होता.

सोसायटीधारकांनी वारंवार तक्रारी करूनही कारवाई होत नसल्याने अखेर त्यांनी थेट आमदार महेश लांडगे यांच्याकडे धाव घेतली. त्यांनी या समस्येची गांभीर्याने दखल घेत पिंपरी-चिंचवड पोलिसांना तात्काळ आणि ठोस पावले उचलण्याचे निर्देश दिले. त्यानंतर पोलिसांनी या बेकायदा देशी दारू अड्ड्यावर कारवाई करत संपूर्ण अड्डा उद्ध्वस्त केला.

या कारवाईमुळे परिसरात सुटकेचा निःश्वास टाकण्यात आला आहे. स्थानिक नागरिक म्हणाले की, “हा दारू अड्डा कधीही मोठा गुन्हा घडवू शकला असता. आता आम्ही निर्धास्त आहोत.”

दरम्यान, या लेबर कॅम्पमध्ये काही मजुरांचे ओळखपत्र नसल्यामुळे ‘बांगलादेशी घुसखोरी’चा संशय उपस्थित केला गेला आहे. स्थानिक नागरिकांनी पोलिसांकडे या संदर्भात सर्च ऑपरेशन राबवण्याची मागणी केली आहे. पोलिसांनीही याची गंभीर दखल घेत पुढील तपास सुरू केला आहे.

राज्य विधिमंडळात झालेल्या निर्णयानुसार, रहिवासी भागातील दारू दुकानांवर कारवाई केली जात आहे. त्याअंतर्गत काही दिवसांपूर्वी ४ दुकाने बंद करण्यात आली होती. आता बेकायदेशीर अड्ड्यांवरही तशीच कठोर कारवाई होत असल्याचे या प्रकरणातून स्पष्ट झाले आहे.

🔸 “नागरिकांच्या सुरक्षेला प्राधान्य देत आम्ही कारवाई केली असून, भविष्यातही असे बेकायदेशीर प्रकार सहन केले जाणार नाहीत. पोलीस प्रशासन सतर्क आहे.” – आ. महेश लांडगे