पुणे :- ज्या सहलीसाठी उत्साहाने तयारी केली, ज्याचं स्वप्न अनेक वर्षांनी प्रत्यक्षात उतरवले… तीच सहल त्यांच्या कुटुंबासाठी आजीवन दु:ख घेऊन आली. पुण्यातील कोंढवा-सासवड रोडवरील फर्साण व्यावसायिक कौस्तुभ गणबोटे आणि त्यांचे जिवलग मित्र, इंटेरियर डिझायनर संतोष जगदाळे यांचा काश्मीरमधील पहलगामजवळ झालेल्या दहशतवादी हल्ल्यात दुर्दैवी मृत्यू झाला.
मंगळवारी (२२ एप्रिल) बायसरण, पहलगाम येथील या भीषण हल्ल्यात किमान २६ पर्यटकांचा बळी गेला, ज्यात महाराष्ट्रातील ६ पर्यटक होते. यातील दोन म्हणजे कौस्तुभ गणबोटे आणि संतोष जगदाळे – पुण्याचे दोन जिवलग मित्र.
“कौस्तुभभाऊंचं हे पहिलंच मोठं घराबाहेरचं ट्रिप होतं. कायम फर्साण व्यवसायात व्यग्र असायचे. नुकताच नव्या घरात शिफ्ट झाले होते आणि पहिल्यांदाच कुटुंबासह बाहेर जाण्याचं ठरवलं होतं,” असं त्यांच्या रस्तापेठेतील मित्र सुनील मोरे यांनी भावनाविवश होऊन सांगितलं.
गणबोटे आणि त्यांची पत्नी संगीता, तसेच संतोष जगदाळे, त्यांची पत्नी प्रगती आणि मुलगी असावरी यांच्यासह हे दोघं कुटुंब एकत्र सहलीला गेले होते. मात्र ही सहल त्यांच्या आयुष्यातील अकल्पित काळरात्र ठरली.
गणबोटे यांना २० वर्षांपूर्वी अपघातात गंभीर भाजल्यामुळे दुसरा जन्म मिळाला होता, असं त्यांचे मित्र सांगतात. पण त्यांच्या या ‘दुसऱ्या आयुष्या’चा दुर्दैवाने असा अंत होईल, असं कोणालाही वाटलं नव्हतं.
कौस्तुभ गणबोटे नुकतेच आजोबा झाले होते. त्यांचं जुनं घर रस्तापेठेत होतं आणि काही महिन्यांपूर्वीच कोंढवा-सासवड रोडवर स्वतःचं घर आणि फॅक्टरी उभारली होती. व्यवसायात वाढ करत त्यांनी आपला परीघ विस्तारला, पण सामाजिक संबंध आणि हृदयपूर्वक वृत्ती कायम ठेवली.
संतोष जगदाळे यांचंही आयुष्य उत्साही होतं. ते हार्मोनियम उत्तम वाजवत आणि विविध ठिकाणी फिरायला आवडत असे. आपल्या मित्राच्या फर्साण ब्रँडसाठी ते मार्केटिंगमध्ये मदत करत. त्यांचं कौस्तुभ गणबोटेंशी फार जिव्हाळ्याचं नातं होतं.
या दोघांच्या कुटुंबांवर दु:खाचा डोंगर कोसळला आहे. त्यांचे मृतदेह बुधवारी उशिरा पुण्यात पोहोचले असून, अंतिम संस्कार वैकुंठ स्मशानभूमीत करण्यात येणार आहेत, अशी माहिती त्यांच्या कुटुंबीयांनी दिली आहे. हा हल्ला केवळ दोन मित्रांचं आयुष्यच नाही तर त्यांच्या पिढ्यांच्या स्वप्नांचाही अंत घेऊन आला आहे.
