पुणे शहरातील हडपसर पोलिसांनी जबरीने मोबाईल लुटणाऱ्या एका सराईत गुन्हेगारास अटक करून मोठी कारवाई केली आहे. या आरोपीकडून तब्बल ३८ मोबाईल आणि ३ दुचाकी वाहने हस्तगत करण्यात आली आहेत. तसेच त्याने हडपसर, लोणी काळभोर आणि खडकी परिसरात जबरी चोरीचे गुन्हे केल्याचे निष्पन्न झाले आहे.
घटनेचा थरार : पहाटेच्या सुमारास मोबाईल लुटला
दि. २४ मार्च २०२५ रोजी पहाटे ३.२० वाजता भाजी मंडई, हडपसर येथे फिर्यादी एका रिक्षाची वाट पाहत उभे होते. त्याचवेळी दोन अनोळखी तरुण दुचाकीवरून आले आणि फिर्यादीच्या हातातील मोबाईल जबरदस्तीने हिसकावून पळ काढला. या घटनेनंतर हडपसर पोलीस ठाण्यात गु.र.नं. ३२७ / २०२५, भारतीय न्याय संहिता कलम ३०९ (४), ३ (५) अंतर्गत गुन्हा दाखल करण्यात आला.
गुन्हेगाराचा शोध आणि पोलिसांची शक्कल
या घटनेचे गांभीर्य लक्षात घेऊन पोलीस उपआयुक्त, परिमंडळ ५, पुणे शहर डॉ. राजकुमार शिंदे यांच्या मार्गदर्शनाखाली वरिष्ठ पोलीस निरीक्षक संजय मोगले यांनी विशेष तपास पथक तयार केले. पोलीस निरीक्षक (गुन्हे) निलेश जगदाळे, पोलीस उपनिरीक्षक हसन मुलाणी, सत्यवान गेंड, तसेच अंमलदार अभिजीत राऊत, तुकाराम झुंजार, अमोल दणके, महावीर लोंढे यांनी तपास सुरू केला.
गोपनीय माहितीच्या आधारे पोलिसांना कळले की, विकास ऊर्फ आकाश सुरेश वाघीरे (२१ वर्षे, रा. मेट्रो स्टेशन, दळवी हॉस्पिटलजवळ, शिवाजीनगर, पुणे) आणि एक विधीसंघर्षग्रस्त बालक हे जबरी चोरी करत आहेत. पोलिसांनी सापळा रचून त्यांना ताब्यात घेतले.
आरोपींनी गुन्ह्याची कबुली दिली; मोठा ऐवज हस्तगत
आरोपींना चौकशीसाठी ताब्यात घेतल्यावर त्यांनी हडपसरमधील गुन्ह्याची कबुली दिली. तसेच त्यांच्याकडून चोरीला गेलेला मोबाईल आणि गुन्ह्यात वापरलेली दुचाकी जप्त करण्यात आली. पुढील चौकशीत चंदननगर पोलीस ठाण्याच्या हद्दीतही त्यांनी असेच गुन्हे केल्याचे उघड झाले.
३ पोलीस ठाण्यांच्या हद्दीत गुन्हे उघड
तपासादरम्यान आरोपींनी तीन वेगवेगळ्या पोलिस ठाण्यांच्या हद्दीत गुन्हे केल्याचे स्पष्ट झाले :
-
हडपसर पोलीस ठाणे – गु.र.नं. ३२७ / २०२५, भारतीय न्याय संहिता कलम ३०९ (४), ३ (५)
-
लोणी काळभोर पोलीस ठाणे – गु.र.नं. १३५ / २०२५, भारतीय न्याय संहिता कलम ३०३ (२)
-
खडकी पोलीस ठाणे – गु.र.नं. ३२६ / २०२४, भारतीय न्याय संहिता कलम ३०४ (२), ३ (५)
