नागरिकांचा रोष आणि पोलिसांची भूमिका
नागपूर शहरात घडलेल्या हिंसक दंगलीनंतर स्थानिक नागरिकांनी आज पोलिस आयुक्त कार्यालयात धडक देत दंगलीच्या मुख्य सूत्रधाराला अटक करण्याची जोरदार मागणी केली. नागरिकांच्या संतप्त घोषणाबाजीमुळे परिसरात मोठी गर्दी झाली होती. दंगलीत अनेक दुकाने, वाहने आणि मालमत्तांचे मोठे नुकसान झाले आहे. हिंसाचारग्रस्त भागातील नागरिकांनी पोलिसांकडे तक्रार करताना दोषींवर तातडीने कठोर कारवाई करण्याची मागणी केली. नागरिकांच्या भावना तीव्र होत असताना पोलिस प्रशासनाने त्यांना शांत राहण्याचे आवाहन केले आहे.
मंत्री चंद्रशेखर बावनकुळे यांची सूचना
या प्रकरणी आज मंत्री चंद्रशेखर बावनकुळे यांनी वरिष्ठ पोलिस अधिकाऱ्यांसोबत बैठक घेतली. बैठकीत त्यांनी दंगल भडकवणाऱ्या प्रमुख सूत्रधाराचा शोध घेऊन त्याला तातडीने अटक करण्याचे आदेश दिले. तसेच, शहरात शांतता आणि सुव्यवस्था राखण्यासाठी आवश्यक ती खबरदारी घेण्याचे निर्देश त्यांनी दिले आहेत.
दंगलीत मोठे नुकसान, अनेक पोलीस जखमी
नागपूरच्या महाल परिसरात औरंगजेबच्या कबरीच्या वादावरून दोन गटांत तणाव निर्माण झाला होता. या घटनेत मोठ्या प्रमाणावर दगडफेक, जाळपोळ आणि मालमत्तेचे नुकसान झाले. या हल्ल्यात पोलीस उपायुक्त निकेतन कदम, डीसीपी शशिकांत सातव, आणि डीसीपी अर्चित चांडक गंभीर जखमी झाले आहेत. त्यांना रुग्णालयात दाखल करण्यात आले आहे.
शहरात कलम १४४ लागू
नागपूर शहरात पुढील काही दिवसांसाठी कलम १४४ लागू करण्यात आले आहे. या अंतर्गत चार किंवा त्यापेक्षा अधिक लोकांना एकत्र जमण्यास मनाई आहे. पोलिसांनी नागरिकांना शांतता राखण्याचे आणि अफवांवर विश्वास न ठेवण्याचे आवाहन केले आहे.
मुख्यमंत्र्यांचा संदेश
मुख्यमंत्री देवेंद्र फडणवीस यांनी या घटनेबाबत तीव्र नाराजी व्यक्त करत दोषींवर कठोर कारवाईचे आदेश दिले आहेत. त्यांनी नागपूर पोलिसांना योग्य ती खबरदारी घेऊन हिंसाचार रोखण्याचे निर्देश दिले आहेत.
