मावळ, ता. ११ मार्च: मावळ, खेड आणि शिरूर तालुक्यातील नागरिकांचा वाहतुकीसंदर्भातील मोठा प्रश्न असलेल्या तळेगाव-चाकण-शिक्रापूर महामार्ग विकासासाठी अखेर सकारात्मक बातमी समोर आली आहे. राज्याचे उपमुख्यमंत्री तथा अर्थमंत्री अजित पवार यांनी सोमवारी (दि. १०) विधानसभेत अर्थसंकल्प सादर करताना या महामार्गाबाबत मोठी घोषणा केली.
तळेगाव-शिक्रापूर रस्त्यासाठी मोठी तरतूद
अर्थसंकल्पात अजित पवार यांनी पुणे ते शिरूर या ५४ किलोमीटर लांबीच्या महामार्गासाठी तब्बल ७,५१५ कोटी रुपये निधी जाहीर केला आहे. त्याचबरोबर, या मार्गावरील तळेगाव ते चाकण या २५ किलोमीटर लांबीचा चार पदरी उन्नत मार्ग उभारण्याची घोषणा करण्यात आली असून त्यासाठी ६,४९९ कोटी रुपये खर्च अपेक्षित आहे.
वाहतूक कोंडीला दिलासा
या चार पदरी महामार्गामुळे तळेगाव ते चाकण या मार्गावर होणारी तीव्र वाहतूक कोंडी लवकरच दूर होणार आहे. यामुळे औद्योगिक क्षेत्रांसाठी प्रसिद्ध असलेल्या तळेगाव, चाकण आणि शिक्रापूर परिसरातील प्रवासी आणि व्यापारी वर्गाला मोठा दिलासा मिळेल.
आमदार सुनील शेळके यांच्या सातत्यपूर्ण प्रयत्नांना यश
या प्रकल्पासाठी मावळचे आमदार सुनील शेळके यांनी विशेष मेहनत घेतली होती. त्यांनी आमदारकीच्या पहिल्या कार्यकाळापासूनच या रस्त्याच्या विकासासाठी सतत पाठपुरावा केला.
-
केंद्रीय रस्ते विकास मंत्री नितीन गडकरी यांची भेट घेऊन विषय मांडला.
-
मुख्यमंत्री एकनाथ शिंदे यांची भेट घेऊन प्रकल्पाची तातडीची गरज अधोरेखित केली.
-
जिल्हा नियोजन समितीमध्ये सातत्याने हा विषय मांडला.
-
विशेष कृती समितीच्या पदाधिकाऱ्यांशी चर्चा करत प्रकल्पाच्या अंमलबजावणीसाठी प्रयत्न केले.
-
विधानसभेत हा विषय अनेकदा मांडून त्यासाठी ठोस निधी मंजूर करण्यास मागणी केली.
