पुणे, ७ मार्च २०२५ – पुणे शहर गुन्हे शाखेच्या युनिट ६ आणि अन्न व औषध प्रशासनाने (FDA) संयुक्त कारवाई करत मांजरी खुर्द येथील गोडाऊनवर धाड टाकून तब्बल १४०० किलो भेसळयुक्त पनीर, ४०० किलो जी एम एस पावडर, १८०० किलो एस एम पी पावडर आणि ७१८ लिटर पामतेल असा एकूण ११ लाख ५६ हजार ६९० रुपये किमतीचा मुद्देमाल जप्त केला आहे.
गेल्या काही काळात पुणे शहरात भेसळयुक्त अन्नपदार्थांचे प्रमाण वाढले आहे. अशा बनावट पदार्थांच्या सेवनामुळे नागरिकांच्या आरोग्यास गंभीर धोका निर्माण होऊ शकतो. विशेषतः दूध व दुग्धजन्य पदार्थांमध्ये मोठ्या प्रमाणात भेसळ होत असल्याचे समोर येत आहे.
पोलिसांची गुप्त माहिती आणि धडक कारवाई
युनिट ६ कडील प्रभारी पोलीस निरीक्षक वाहिद पठाण यांना मिळालेल्या गुप्त बातमीवरून ही मोठी कारवाई करण्यात आली. पोलीस अंमलदार सचिन पवार आणि रमेश मेमाणे यांना मिळालेल्या माहितीनंतर अन्न व औषध प्रशासनास संपर्क साधून सदर गोडाऊनवर छापा टाकण्यात आला.
या कारवाईत आढळले की, या गोडाऊनमध्ये मोठ्या प्रमाणावर भेसळयुक्त पनीर तयार केले जात होते. यासाठी केमिकलयुक्त जी एम एस पावडर, एस एम पी पावडर आणि आरोग्यास अपायकारक पामतेलाचा वापर केला जात होता. अशा भेसळीमुळे नागरिकांच्या आरोग्यावर गंभीर परिणाम होऊ शकतो.
विशेषज्ञांच्या मते, अशा भेसळयुक्त पदार्थांचे सेवन केल्यास अन्न विषबाधा, पचनसंस्था बिघडणे, किडनी व लिव्हरवर विपरीत परिणाम, त्वचाविकार आणि कॅन्सरसारख्या आजारांचा धोका संभवतो. त्यामुळे नागरिकांनी अत्यंत काळजी घेणे गरजेचे आहे.
पुढील कायदेशीर कारवाई सुरू – दोषींवर कठोर कारवाईचा इशारा!
या प्रकरणी अन्न व औषध प्रशासनाने पुढील तपास सुरू केला आहे. अन्न सुरक्षा कायद्यांतर्गत दोषींवर कठोर कारवाई करण्यात येणार असल्याचे प्रशासनाने स्पष्ट केले आहे.
पुणेकरांसाठी महत्वाचे आवाहन!
🔹 स्थानिक नागरिकांनी भेसळयुक्त अन्नपदार्थ खरेदी करताना काळजी घ्यावी. 🔹 संशयास्पद पदार्थ किंवा अन्नवस्तू आढळल्यास अन्न व औषध प्रशासनाच्या हेल्पलाईनवर तक्रार करावी. 🔹 सुरक्षित व शुद्ध अन्नपदार्थ निवडून आपल्या कुटुंबाचे आरोग्य जपा!
प्रशंसनीय पोलिस व FDA टीमची कामगिरी
🔸 सदरची कारवाई अप्पर पोलीस आयुक्त (गुन्हे) शैलेश बलकवडे, पोलीस उपआयुक्त (गुन्हे) निखिल पिंगळे, सहा. पोलीस आयुक्त (गुन्हे २) राजेंद्र मुळीक यांच्या मार्गदर्शनाखाली करण्यात आली.
🔸 युनिट ६ कडील प्रभारी पोलीस निरीक्षक वाहिद पठाण, सहा. पोलीस निरीक्षक मदन कांबळे, पोलीस उपनिरीक्षक रामकृष्ण दळवी, तसेच पोलीस अंमलदार रमेश मेमाणे, नितीन मुंढे, कानिफनाथ कारखेले, सचिन पवार, गणेश डोंगरे, बाळासाहेब तनपुरे, सुहास तांबेकर यांनी यशस्वीपणे ही कारवाई पार पाडली.
🔸 FDA च्या सहआयुक्त (दक्षता) डॉ. राहूल खाडे, सहाय्यक आयुक्त (अन्न) नारायण सरकटे, अन्न सुरक्षा अधिकारी बालाजी शिंदे, अस्मिता गायकवाड, सुप्रिया जगताप, एल. डब्ल्यू. साळवे यांनीही महत्त्वपूर्ण भूमिका बजावली.
🔹 प्रशासनाने नागरिकांना भेसळयुक्त पदार्थ ओळखण्यासाठी सतर्क राहण्याचे आवाहन केले आहे.
