मा. पोलीस आयुक्त, पुणे शहर यांच्या संकल्पनेतून साकारलेल्या पुणे वाहतूक पोलीस अकादमीचे पहिले प्रशिक्षण सत्र अत्यंत यशस्वीरीत्या पार पडले. २३ फेब्रुवारी २०२५ ते २५ फेब्रुवारी २०२५ या कालावधीत झालेल्या या विशेष सत्रामध्ये वाहतूक शाखेतील अधिकारी व अंमलदार यांना आंतरराष्ट्रीय पातळीवरील तज्ज्ञांकडून प्रशिक्षण देण्यात आले.
वाहतूक पोलीस दलासाठी व्यापक प्रशिक्षणाचा उपक्रम!
सदर प्रशिक्षण सत्रात वाहतूक पोलिसांना सॉफ्ट स्किल्स, मानसोपचार, मोटार वाहन कायदा, वाहतूक नियमन, ग्रीन कॉरिडॉर, व्हीआयपी सुरक्षा व्यवस्थापन, ई-चलान प्रणाली, पीसीआर (प्राथमिक उपचार), अग्निशमन आणि पोलिसांचे जनतेशी वर्तन यासारख्या महत्त्वाच्या विषयांवर सखोल मार्गदर्शन करण्यात आले.
अभ्यासक्रमातील महत्त्वाचे मुद्दे:
✔️ वाहतूक पोलीसांचे वर्तन आणि जनतेशी संवाद कौशल्य ✔️ आपत्कालीन परिस्थितीत तातडीने कार्यवाही करण्याचे तंत्र ✔️ ग्रीन कॉरिडॉर आणि व्हीआयपी सुरक्षा व्यवस्थापन ✔️ मोटार वाहन कायद्याचा अंमलबजावणीतील प्रभावी वापर ✔️ डिजिटल वाहतूक व्यवस्थापन आणि ई-चलान प्रणाली
तज्ज्ञ मार्गदर्शकांचा सहभाग
या प्रशिक्षण सत्रात सॉफ्ट स्किल्स प्रशिक्षक, मानसोपचार तज्ज्ञ, आरटीओ अधिकारी आणि पोलीस अधिकारी यांनी मार्गदर्शन केले. 🔹 श्रीमती मंजिरी गोखले, श्री सुरेश गोखले, श्रीमती उर्मिला दीक्षित (मानसोपचार तज्ज्ञ), श्री अनिल पंतोजी (RTO), श्री प्रकाश जाधव (RTO), सहायक पोलीस निरीक्षक विजय पळसुले, सहायक पोलीस निरीक्षक सुरेंद्र देशमुख आणि पोलीस उपनिरीक्षक रघतवान यांनी विशेष मार्गदर्शन केले.
१०० दिवसांत १००% वाहतूक पोलीसांना प्रशिक्षण
पुणे वाहतूक पोलीस अकादमीच्या पुढील टप्प्यात, येत्या १०० दिवसांत वाहतूक शाखेतील १००% पोलीस अधिकारी आणि अंमलदारांना प्रशिक्षण देण्यात येणार आहे. भविष्यात या अकादमीत तांत्रिक आणि इतर विशेष प्रशिक्षणांचा समावेश करून तिची व्याप्ती अधिक वाढवण्यात येईल.
समन्वय अधिकारी म्हणून जबाबदारी:
🔹 पोलीस निरीक्षक रूनाल मुल्ला, पोलीस निरीक्षक बाळकोटगी आणि ग्रेडेड पोलीस उपनिरीक्षक रघतवान यांची या उपक्रमासाठी विशेष समन्वय अधिकारी म्हणून नियुक्ती करण्यात आली आहे.
पोलीस दलाच्या कार्यक्षमतेत वृद्धी करणारा क्रांतिकारी उपक्रम!
🔹 पुणे वाहतूक पोलीस अकादमीच्या माध्यमातून वाहतूक व्यवस्थापन अधिक सक्षम व आधुनिक करण्याच्या दिशेने मोठे पाऊल उचलले गेले आहे.
