पुणे शहर पोलिसांनी हरविलेले किंवा गहाळ झालेले तब्बल ४५६ मोबाईल फोन शोधून नागरिकांना परत दिले असून, या उल्लेखनीय कामगिरीमुळे नागरिकांमध्ये पोलिसांविषयी आदराची भावना निर्माण झाली आहे. सी.ई.आय.आर. पोर्टलच्या माध्यमातून ही मोठी कारवाई पार पडली असून, गेल्या काही महिन्यांपासून मोबाईल हरवल्याच्या वाढत्या तक्रारींच्या पार्श्वभूमीवर पोलिसांनी घेतलेला हा पुढाकार कौतुकास्पद ठरला आहे.
लोकांच्या मोबाईल चोरीस प्रतिबंधासाठी पुणे पोलिसांचा महत्त्वपूर्ण निर्णय
हरविलेले मोबाईल फोन परत मिळवण्यासाठी पुणे शहर पोलिसांनी “लॉस्ट अँड फाउंड” पोर्टल सुरू केले आहे, जिथे नागरिक त्यांचे हरविलेले मोबाईल फोन गहाळ झाल्याची नोंद करू शकतात. या तक्रारींच्या आधारे सी.ई.आय.आर. पोर्टलवरून तांत्रिक विश्लेषणाद्वारे मोबाईलचा माग काढला जातो. पोलीस आयुक्त श्री. अमितेश कुमार यांच्या मार्गदर्शनाखाली गुन्हे शाखा, संगणक शाखा व सायबर पोलीस ठाण्याच्या पथकाने अथक परिश्रम घेत नागरिकांना त्यांचे मोबाईल फोन परत मिळवून देण्याचे मोठे कार्य केले आहे.
हरविलेले ४५६ मोबाईल नागरिकांच्या हातात – आनंदोत्सवाचा क्षण!
दि. १४ फेब्रुवारी २०२५ रोजी पुणे पोलीस मुख्यालय, शिवाजीनगर येथे हिरकणी हॉलमध्ये विशेष कार्यक्रमाचे आयोजन करण्यात आले. यावेळी पुणे शहर पोलीस आयुक्तांच्या हस्ते हरविलेले मोबाईल फोन नागरिकांना परत देण्यात आले. आपल्या मोबाईल फोनची आशा सोडलेले नागरिक जेव्हा पुन्हा त्यांचे फोन मिळाले तेव्हा त्यांच्या आनंदाला पारावार उरला नाही. अनेकांनी पोलीस दलाचे आभार मानत त्यांच्या कार्याबद्दल गौरवोद्गार काढले.
पुणे पोलिसांचे कठोर परिश्रम – लोकहितासाठी केलेले योगदान
या कारवाईमध्ये सहाय्यक पोलीस आयुक्त, सायबर पोलीस स्टेशन प्रमुख अधिकारी, तसेच सहा विशेष पथकांचा सहभाग होता. गेल्या महिनाभराच्या प्रयत्नांनंतर २३०० तक्रारींपैकी ४५६ मोबाईल शोधण्यात आले असून, उर्वरित मोबाईल शोधण्याचे काम पोलिसांकडून सुरूच आहे.
पोलिसांचे नागरिकांना आवाहन – हरविलेल्या मोबाईलसाठी सी.ई.आय.आर. पोर्टलचा वापर करा!
सायबर पोलिसांकडून नागरिकांना आपल्या हरविलेल्या मोबाईलसाठी तक्रार नोंदविण्याचे आवाहन करण्यात आले आहे. लॉस्ट अँड फाउंड पोर्टलवर तक्रार नोंदवल्यास पोलिसांना शोधमोहीम राबविण्यास मदत मिळते. त्यामुळे मोबाईल चोरी, गहाळ होण्याच्या घटनांवर प्रतिबंध घालता येईल.
