पुणे शहरात ऑनलाईन फसवणुकीच्या घटनांमध्ये सातत्याने वाढ होत आहे. आंबेगाव पोलीस ठाण्याच्या हद्दीत एका व्यक्तीला पार्ट-टाइम जॉबचे आमिष दाखवत तब्बल १० लाख ३१ हजार रुपयांची फसवणूक केल्याचा प्रकार उघडकीस आला आहे. याबाबत पोलिसांनी गुन्हा दाखल केला असून, सध्या आरोपी मोबाईल धारक फरार आहे.
फसवणुकीचा प्रकार आणि गुन्हा नोंद
फिर्यादी यांनी दिलेल्या तक्रारीनुसार, दि. 6 फेब्रुवारी २०२४ रोजी एका अनोळखी इसमाने त्यांच्याशी संपर्क साधला. ऑनलाईन प्लॅटफॉर्मवरून आकर्षक पार्ट-टाइम जॉबचे आमिष दाखवत त्यांचा विश्वास संपादन केला. सुरुवातीला काही प्रमाणात पैसे मिळाल्याने फिर्यादीला अधिक गुंतवणुकीसाठी प्रवृत्त करण्यात आले. मात्र, त्यानंतर मोठ्या रकमेची मागणी करत१०.३१ लाख रुपये घेतल्यानंतर आरोपी फरार झाला.
याबाबत आंबेगाव पोलीस ठाण्यात गुन्हा क्रमांक ९८/२०२५ अन्वये भारतीय दंड संहिता कलम ४१९, ४२० आणि माहिती तंत्रज्ञान कायद्याच्या कलम ६६(डी) अंतर्गत गुन्हा दाखल करण्यात आला आहे.
सायबर गुन्ह्यांमध्ये वाढ – नागरिकांनी सतर्क राहावे!
या घटनेमुळे पुणेकरांमध्ये मोठी खळबळ उडाली असून, सायबर फसवणुकीच्या वाढत्या घटनांवर पोलीस प्रशासनाने चिंता व्यक्त केली आहे. ऑनलाईन नोकरीच्या नावाखाली नागरिकांची फसवणूक करणाऱ्या टोळ्या सक्रिय झाल्या आहेत. पोलिसांनी नागरिकांना कोणत्याही संशयास्पद लिंकवर क्लिक करू नये, तसेच अनोळखी व्यक्तींना आर्थिक व्यवहार करू नये, असा सल्ला दिला आहे.
पोलिसांकडून तपास सुरू – माहिती असल्यास संपर्क साधावा
सध्या आरोपी मोबाईल धारकाचा शोध घेण्यासाठी पोलिसांचे पथक काम करत असून, वरिष्ठ पोलीस निरीक्षक श्री. झिने (मो. नं. ८८८८८१३३०१) यांच्या मार्गदर्शनाखाली तपास सुरू आहे. नागरिकांनी अशा प्रकारच्या कोणत्याही फसवणुकीच्या घटना घडल्यास त्वरित पोलिसांना माहिती द्यावी, असे आवाहन करण्यात आले आहे.
