मुंबई, पुणे: बाबा सिद्दीकी हत्या प्रकरणात मुंबई क्राईम ब्रँचने दोन आरोपींना अटक केली आहे. आरोपी गौरव आपुने (२३) याला ६ नोव्हेंबर रोजी पुण्यातील कर्वेनगर येथून अटक करण्यात आली होती, तर अन्य आरोपी आदित्य राजू गुलांकर (२२) आणि रफीक नियाज शेख (२२) यांना ७ नोव्हेंबर रोजी अटक करण्यात आली आहे. गौरव आपुने, रुपेश मोहोल आणि शोधात असलेला आरोपी शुभम लोंकार यांनी २८ जुलै रोजी झारखंडमध्ये फायरिंग प्रशिक्षणासाठी प्रवास केला होता.
एफपीजेने (FPJ) मिळवलेल्या पुराव्यानुसार, हे तिघे पुणे-हटिया एक्सप्रेसने प्रवास करत झारखंडमधील हटिया रेल्वे स्थानकावर पोहोचले. या प्रवासासाठीचे रेल्वे तिकीट पुरावा म्हणून सादर केले गेले आहे. हटिया हे झारखंडच्या राजधानी रांचीचे उपनगर असून, येथे त्यांनी फायरिंगचे प्रशिक्षण घेतल्याचे सांगण्यात येते.
वरिष्ठ पोलीस निरीक्षक दत्ता नलवडे यांनी दिलेल्या माहितीनुसार, या प्रकरणातील एक ९mm पिस्तूल आधीच शिवम कोहाड यांच्या निवासस्थानी आढळले आहे. शिवाय, तब्बल ६४ गोळ्या पोलिसांनी या प्रकरणात जप्त केल्या आहेत. संशयितांकडे अजून ४० गोळ्या असण्याची शक्यता असून, पोलिस त्या जप्त करण्याच्या प्रयत्नात आहेत.
पोलिसांच्या चौकशीत असेही समोर आले की, बाबा सिद्दीकी यांच्या हत्येच्या कटात वापरण्यासाठी आदित्य आणि रफीकला ही पिस्तूल देण्यात आली होती. हे पिस्तूल त्यांनी नंतर परत करून शिवम कोहाड यांच्याकडे ठेवले होते. तसेच, आदित्य आणि रफीक यांनी खडकवासला येथेही फायरिंग प्रॅक्टिस केल्याचे उघड झाले आहे.
पोलीस या प्रकरणातील इतर आरोपींचा शोध घेत असून, या हत्याकांडात वापरण्यात आलेल्या शस्त्रसाठ्यासह इतर पुरावे गोळा करण्यासाठी तपास सुरू आहे. हे प्रकरण आणखी गंभीर होत असल्याने, आरोपींना १३ नोव्हेंबरपर्यंत पोलिस कोठडीत ठेवण्यात आले आहे.
