विधानसभा सार्वत्रिक निवडणूक २०२४ च्या अनुषंगाने मतदान प्रक्रियेत सर्वांनी मोठ्या संख्येने सहभागी होऊन मतदानाचा हक्क बजवावा, असे आवाहन मतदान जनजागृती रॅलीच्या माध्यमातून करण्यात आले. लोकशाहीच्या या सर्वात मोठ्या उत्सवात सक्रिय सहभाग घेऊन देशाच्या विकासात मोलाचे योगदान द्यावे, हे यामागील मुख्य उद्दिष्ट आहे.
२०५ चिंचवड विधानसभा मतदारसंघाअंतर्गत निवडणूक निर्णय अधिकारी कार्यालयाच्या स्वीप टीमच्या वतीने विकासनगर आणि किवळे परिसरात आयोजित करण्यात आलेल्या या मतदान जनजागृती रॅलीत मोठ्या संख्येने शालेय विद्यार्थ्यांनी तसेच नागरिकांनी सहभाग नोंदविला. विद्यार्थ्यांनी “मतदान सर्व श्रेष्ठ दान”, “अठरा वर्ष केले पार”, “आम्ही करू मतदान” अशा उत्साही घोषणा दिल्या. विविध घोषणांचे फलक हातात धरून विद्यार्थ्यांनी उपस्थितांची लक्ष वेधून घेतली.
रॅलीद्वारे विकासनगर आणि किवळे परिसरातील गृहसंस्था, कॉलनी, चौकांमध्ये मतदानाबाबत जनजागृती करण्यात आली. स्वीप टीमने स्थानिक मतदारांशी चर्चा करून लोकशाहीत मतदानाचे महत्त्व, नवमतदारांसाठी मतदानाची प्रक्रिया, तसेच मतदार यादीत नाव शोधण्याची पद्धत याबाबत सविस्तर माहिती दिली. यामुळे नागरिकांना मतदान करण्याबाबत जागरूकता वाढवण्यात मदत झाली.
अभियानाच्या एक भाग म्हणून, सहभागी विद्यार्थ्यांकडून “भारतीय घटनेने मला मतदान करण्याचा अधिकार दिला आहे. त्या अधिकाराचा वापर करून मी सर्वोत्तम उमेदवाराची निवड करीन” अशा आशयाची संकल्प पत्रे देखील वाचन करण्यात आली. ही संकल्पना मतदारांना त्यांच्या अधिकारांची जाणीव करून देण्यासाठी महत्त्वाची ठरली.
काळेवाडी येथील ज्योतिबा उद्यानामध्ये सकाळी चिंचवड विधानसभा मतदार संघाच्या स्वीप टिमच्या वतीने आयोजित करण्यात आलेल्या मतदार जनजागृती कार्यक्रमात उपस्थित नागरिकांनी १०० टक्के मतदान करण्याचा निर्धार दर्शविला. या कार्यक्रमाने स्थानिक नागरिकांना मतदानाची महत्त्वाची माहिती मिळवून दिली आणि त्यांच्या मनात मतदानाबाबत जागरूकता वाढवली.
या सर्व उपक्रमांचा उद्देश लोकशाहीत सर्वांच्या सक्रिय सहभागाला प्रोत्साहित करणे, मतदानाची टक्केवारी वाढवणे आणि देशाच्या उज्वल भवितव्याची काळजी घेणे आहे.
