ओडिशाच्या उत्तर किनाऱ्याला धोका निर्माण करणारे ‘डाना’ चक्रीवादळ मोठ्या वेगाने उत्तरे-उत्तर पश्चिमेकडे सरकत आहे. भारतीय हवामान खात्याच्या (IMD) अंदाजानुसार, हे चक्रीवादळ आज मध्यरात्री किंवा उद्या पहाटे पुरी आणि सागर बेटावर तडाखा देईल. या वादळाची वेग १०० ते ११० किमी प्रतितास असेल, तर कमाल वेग १२० किमी प्रतितास होण्याची शक्यता आहे.
वृत्तानुसार, ओडिशाच्या अनेक जिल्ह्यांमध्ये आणि पश्चिम बंगालच्या काही भागांत अतिवृष्टीचा इशारा दिला आहे. बालेश्वर, भद्रक, जाजपूर, पुरी, मिदनापूर आणि उत्तर २४ परगणा या भागांमध्ये २०.४ सेंटीमीटरपेक्षा अधिक पाऊस पडण्याची शक्यता वर्तवली आहे. प्रशासनाने सर्व नागरिकांना सतर्क राहण्याचा आणि तात्काळ सुरक्षित ठिकाणी स्थलांतर करण्याचा सल्ला दिला आहे.
अतिवृष्टीचा इशारा:
चक्रीवादळाच्या प्रभावामुळे या भागांमध्ये पूर परिस्थिती निर्माण होण्याची दाट शक्यता आहे. अतिवृष्टीमुळे नदीच्या पातळीत मोठ्या प्रमाणात वाढ होऊन नद्यांच्या काठावरील गावांमध्ये पाणी शिरण्याची भीती व्यक्त केली जात आहे.
काही भागांत वीज आणि दूरसंचार सेवेवर परिणाम होण्याची शक्यता:
वाऱ्याचा वेग प्रचंड असल्यामुळे काही ठिकाणी वीजपुरवठा खंडित होण्याची शक्यता आहे. तसेच, झाडे उन्मळून पडण्याचा धोका आहे. या परिस्थितीत प्रशासनाने आवश्यक ती खबरदारी घेण्यास सुरुवात केली आहे.
सर्वसामान्यांसाठी सूचना:
चक्रीवादळाच्या पार्श्वभूमीवर स्थानिक प्रशासनाने किनारपट्टीवरील लोकांना समुद्र किनाऱ्यापासून दूर राहण्याचा आणि प्रशासनाने दिलेल्या सूचनांचे पालन करण्याचे आवाहन केले आहे. नागरिकांना सुरक्षित स्थळी हलविण्याची प्रक्रिया सुरू झाली आहे आणि राष्ट्रीय आपत्ती प्रतिसाद दल (NDRF) ची पथके देखील तयारीत आहेत.
