देहू | Dehu येथे ३ ते ५ मार्च २०२६ या कालावधीत संत तुकाराम महाराज बीज सोहळा मोठ्या भक्तिभावाने साजरा करण्यात येणार आहे. या सोहळ्यानिमित्त महाराष्ट्रासह इतर राज्यांतून लाखो भाविक आणि वारकरी देहूत दाखल होण्याची शक्यता आहे. भाविकांची वाढती गर्दी लक्षात घेता सार्वजनिक आरोग्य आणि सुरक्षेच्या दृष्टीने प्रशासनाने महत्त्वपूर्ण प्रतिबंधात्मक उपाययोजना जाहीर केल्या आहेत.
या पार्श्वभूमीवर जिल्हादंडाधिकारी Jitendra Dudi यांनी Mumbai Police Act 1951 मधील कलम ३३ (१)(ड) अन्वये अधिकार वापरून आदेश जारी केले आहेत. आदेशानुसार देहू येथील इंद्रायणी नदीच्या दोन्ही तीरांवरील पाणी पिण्यासाठी किंवा स्वयंपाकासाठी वापरण्यास सक्त मनाई करण्यात आली आहे.
भाविकांनी नदीचे पाणी थेट पिण्यास वापरू नये, तसेच नदीपात्रात कपडे धुणे, अंघोळ करणे किंवा पाणी दूषित होईल असे कोणतेही कृत्य करू नये, असे स्पष्ट निर्देश देण्यात आले आहेत. सोहळ्यादरम्यान पिण्याच्या पाण्यासाठी सार्वजनिक नळ व्यवस्था आणि टँकरची सुविधा उपलब्ध करून देण्यात येणार आहे. भाविकांनी प्रशासनाने उपलब्ध करून दिलेल्या पाणीपुरवठा सुविधेचाच वापर करावा, असे आवाहन करण्यात आले आहे.
इंद्रायणी नदी परिसरात स्वच्छता आणि पर्यावरण संरक्षणासाठी विशेष पथके नियुक्त करण्यात येणार असून, आरोग्य विभागाकडूनही तपासणी व देखरेख ठेवली जाणार आहे. मोठ्या संख्येने भाविक येत असल्याने पाणी दूषित होण्याची शक्यता टाळण्यासाठी हे आदेश लागू करण्यात आले आहेत.
या आदेशाचे उल्लंघन केल्यास मुंबई पोलीस अधिनियम १९५१ च्या कलम १३१ अन्वये संबंधितांवर कायदेशीर कारवाई करण्यात येईल, असा इशाराही प्रशासनाने दिला आहे. प्रशासनाने भाविकांना सहकार्य करण्याचे आवाहन करत, “सोहळा शांततेत, सुरक्षिततेत आणि स्वच्छतेच्या वातावरणात पार पडावा यासाठी सर्वांनी नियमांचे पालन करावे,” असे म्हटले आहे.
