आज वॉर्ड क्र. २०१ मधील शिवसेना उमेदवार रेखा मयुर कांबळे यांच्या मुख्य निवडणूक कार्यालयाचे उद्घाटन युवासेनाप्रमुख, शिवसेना नेते आणि मा. आदित्य ठाकरे यांच्या शुभहस्ते मोठ्या उत्साहात पार पडले. या कार्यक्रमामुळे संपूर्ण वॉर्डात राजकीय वातावरण तापले असून शिवसैनिकांमध्ये नवे चैतन्य संचारले आहे.
उद्घाटनप्रसंगी परिसरातील शिवसैनिक, युवासैनिक, महिला आघाडी आणि स्थानिक नागरिकांनी मोठ्या संख्येने उपस्थिती लावली होती. ढोल-ताशांच्या गजरात आणि जोरदार घोषणाबाजी करत शिवसैनिकांनी आदित्य ठाकरे यांचे उत्स्फूर्त स्वागत केले. यावेळी “शिवसेना जिंदाबाद”, “आदित्य ठाकरे आगे बढो” अशा घोषणांनी परिसर दणाणून गेला.
कार्यक्रमात बोलताना आदित्य ठाकरे यांनी सांगितले की, “स्थानिक प्रश्नांची जाण असलेले आणि जनतेशी थेट नाते ठेवणारे नेतृत्वच खऱ्या अर्थाने विकास घडवू शकते. रेखा कांबळे या वॉर्डातील प्रत्येक घटकासाठी काम करणाऱ्या उमेदवार आहेत.” त्यांनी शिवसैनिकांना एकजुटीने आणि ताकदीने निवडणुकीत उतरून विजय मिळवण्याचे आवाहन केले.
यावेळी उमेदवार रेखा मयुर कांबळे यांनीही भावना व्यक्त करत सांगितले की, “वॉर्डातील नागरी समस्या, महिला सक्षमीकरण, युवकांना संधी आणि मूलभूत सुविधा मजबूत करण्यासाठी आपण कटिबद्ध आहोत.” शिवसेनेच्या विचारधारेवर विश्वास ठेवून जनतेने साथ द्यावी, असे आवाहन त्यांनी केले. या प्रसंगी शिवसैनिकांनी निवडणूक संघर्ष ताकदीने लढण्याचा आणि शिवसेनेचा झेंडा वॉर्ड क्र. २०१ मध्ये फडकावण्याचा निर्धार व्यक्त केला. या उद्घाटनामुळे शिवसेनेच्या प्रचाराला नवी गती मिळाल्याचे चित्र स्पष्टपणे दिसून आले.
