मुंबई : महाराष्ट्र राज्याच्या पोलीस महासंचालक मा. रश्मी शुक्ला यांचा आज अधिकृत कार्यकाळ पूर्ण झाला. त्यांच्या कार्यकाळात राज्यातील पोलीस प्रशासन अधिक शिस्तबद्ध, तंत्रज्ञानस्नेही आणि कार्यक्षम बनवण्यावर भर देण्यात आला. कायदा व सुव्यवस्था राखणे, सायबर गुन्हेगारीवर नियंत्रण, तसेच महिला व नागरिकांच्या सुरक्षेसाठी त्यांनी अनेक महत्त्वपूर्ण पावले उचलली.
त्यांच्या पश्चात १९९० तुकडीचे भारतीय पोलीस सेवेचे (भा.पो.से.) वरिष्ठ अधिकारी श्री. सदानंद दाते यांनी महाराष्ट्र राज्य पोलीस महासंचालक पदाचा पदभार स्वीकारला आहे. दाते यांना अंतर्गत सुरक्षा, दहशतवादविरोधी कारवाई, गुप्तचर यंत्रणा आणि आधुनिक पोलिसिंगचा प्रदीर्घ अनुभव आहे. त्यांनी यापूर्वी एटीएस, आयबी तसेच महत्त्वाच्या प्रशासकीय जबाबदाऱ्या यशस्वीपणे सांभाळल्या आहेत.
नव्या नेतृत्वाखाली महाराष्ट्र पोलीस दल अधिक सक्षम, गतिमान आणि नागरिककेंद्री होईल, अशी अपेक्षा व्यक्त केली जात आहे. कायदा-सुव्यवस्था, गुन्हेगारी नियंत्रण, सायबर सुरक्षा आणि सार्वजनिक विश्वास वृद्धिंगत करणे या बाबींवर भर देत दाते यांच्या अनुभवाचा राज्याला मोठा लाभ होणार आहे. पोलीस दलातील अधिकारी व कर्मचाऱ्यांमध्येही नव्या ऊर्जा आणि आत्मविश्वासाचे वातावरण निर्माण झाल्याचे दिसून येत आहे.
