अकोला जिल्ह्यातील नगरपरिषद सार्वत्रिक निवडणुकांच्या पार्श्वभूमीवर आयोजित प्रचारसभेत उपमुख्यमंत्री अजित पवार यांनी आज दमदार भाषण करत संविधान दिनानिमित्त नागरिकांना मनःपूर्वक शुभेच्छा दिल्या. भारताचे संविधान देणारे महामानव, भारतरत्न डॉ. बाबासाहेब आंबेडकरांना त्यांनी कृतज्ञतापूर्वक अभिवादन केले आणि “जगातलं सर्वोत्तम संविधान भारताला लाभलं आहे” असे सांगत बाबासाहेबांच्या कार्याचे स्मरण केले.

सभेला नागरिक, पदाधिकारी आणि मोठ्या संख्येने कार्यकर्ते उपस्थित होते. उपस्थितांमध्ये मोठी उत्सुकता होती आणि पवारांच्या भाषणाला प्रचंड टाळ्यांचा कडकडाट मिळाला.

“शिव-शाहू-फुले-आंबेडकर विचारांचा महाराष्ट्र; हा वारसा आम्ही जपतोय”— अजित पवार

अजित पवार म्हणाले,
“शिवरायांचा स्वाभिमान, शाहू महाराजांचे सामाजिक न्याय, महात्मा फुले यांची प्रबोधनपर विचारधारा आणि बाबासाहेबांचा संविधानिक मार्ग — हे चार स्तंभ महाराष्ट्राची खरी ओळख आहेत.”

अकोट तालुका हा सर्व धर्म–सर्व समाजांना एका धाग्यात बांधणारा प्रदेश असल्याचे सांगून पवारांनी या एकात्मतेची प्रशंसा केली.

अकोटच्या मूलभूत सुविधांवर टोकाची टीका — “रस्ते खड्डेमुक्त, नाले स्वच्छ, अंधारमुक्त शहराची वेळ आली”

शहरातील रस्त्यांची खराब अवस्था, तुटक नाले, पाणीपुरवठ्याची समस्या, आठवडे बाजारातील अव्यवस्था, अस्वच्छता, हिरवळ व मैदानांचा अभाव — या सर्व प्रश्नांवर पवारांनी सविस्तर भाष्य केले.

ते म्हणाले,
“अकोट नगरपालिका क्षेत्रात बदलाची गरज आहे. शहर बकाल नसावं, अस्वच्छता नसावी. संत गाडगेबाबा आणि तुकडोजी महाराजांनी स्वच्छतेचा संदेश दिला— तोच मार्ग आपण स्वीकारायचा आहे.”

“शेतकरी माझा परिवार” — अडचणीतल्या शेतकऱ्याला तत्काळ मदत ही आमची भूमिका

सभेत शेतकऱ्यांच्या प्रश्नांवरही त्यांनी थेट भाष्य केले.
अतिवृष्टी, नैसर्गिक आपत्तीमुळे त्रस्त झालेल्या शेतकऱ्यांना राज्य सरकारने तातडीने मदत केली असल्याचे ते म्हणाले.

“शेतकरी अडचणीत असेल, तर महाराष्ट्र अडचणीत येतो. शेतकरी कुटुंबाचा हात धरला तर राज्याचा हात मजबूत होतो,” असे पवारांनी सांगितले.

“सत्ता लोकांच्या प्रश्नांसाठी — आणि तेच आम्ही सिद्ध करून दाखवलं आहे”

राजकारणात सत्तेचा नेमका उपयोग काय असावा, यावर भाष्य करताना ते म्हणाले —
“सत्ता लोकांचे प्रश्न सोडवण्यासाठी वापरली तरच तिचे महत्व आहे. आमची भूमिका नेहमीच अशीच राहिली आहे.”

चारही नगराध्यक्ष व नगरसेवक उमेदवार सक्षम — ‘घड्याळ’ आणि ‘धनुष्यबाण’ चिन्हावरच बटण दाबा!

अजित पवारांनी उमेदवारांची ओळख करून देताना सांगितले की —

• गाजिया बानो बदरुज्जमा (अकोट)

• आंचल ओंकारे (हिवरखेड)

• कृष्णराव गावंडे (मूर्तिजापूर)

• राजकन्या पवार (तेल्हारा)

हे चारही उमेदवार जनसेवा करण्यास सक्षम, प्रामाणिक आणि नागरिकांच्या प्रश्नांशी बांधील आहेत.

“घड्याळ आणि धनुष्यबाण या चिन्हांवरील बटण दाबा आणि विकासाला गती द्या”, असे त्यांनी नागरिकांना आवाहन केले.

“जबाबदारी आम्हाला द्या — अकोट-अकोला जिल्ह्याचा कायापालट हमखास करतो”

अजित पवारांनी आत्मविश्वासाने सांगितले —
“एकदा नगरपालिका आमच्याकडे द्या, आम्ही अकोट तालुक्यात विकासगंगा प्रत्येक कोपऱ्यात पोहोचवू. अकोटचा कायापालट होणारच, हा माझा शब्द आहे.”

सभास्थळी नागरिकांचा उत्साह, जयजयकार आणि टाळ्यांचा कडकडाट पाहता राष्ट्रवादी काँग्रेसच्या प्रचाराला जोरदार गती मिळाल्याचे स्पष्टपणे जाणवत होते.