पुणे शहरात धक्कादायक फसवणुकीचा प्रकार उघडकीस आला आहे. स्वतःला आयपीएस अधिकारी असल्याचं भासवणाऱ्या सागर वाघमोडे या तरुणाला पुणे पोलिसांनी अटक केली आहे. तो गेल्या काही महिन्यांपासून शहरातील अनेक वरिष्ठ अधिकाऱ्यांची फसवणूक करत होता. आणखी धक्कादायक म्हणजे या तोतया अधिकाऱ्याचा भांडाफोड थेट पुणे पोलिस आयुक्तालयातच झाला.
काय आहे संपूर्ण प्रकरण?
पोलिसांच्या माहितीनुसार, सागर वाघमोडे हा स्वतःला परिमंडळ एकचे पोलिस उपायुक्त कृषिकेश रावले यांचा बॅचमेट असल्याचं सांगत फिरत होता.
त्याने पुण्यातील भाविक जितेंद्र शहा या व्यक्तीला फसवले आणि त्यांच्यासोबत अनेक सरकारी अधिकाऱ्यांच्या भेटीगाठी घेतल्या. वाघमोडेने स्वतःला आयपीएस अधिकारी म्हणून ओळख देत शहा यांना महापालिकेचे अतिरिक्त आयुक्त, एसीपी लष्कर, आयकर आयुक्त यांच्याकडे नेले आणि अधिकाऱ्यांमध्ये आपली ‘ओळख’ असल्याचा खोटा आव आणला.
फसवणुकीचा भांडाफोड कसा झाला?
सागर वाघमोडे थेट पुणे पोलिस आयुक्तालयात गेला आणि विशेष शाखेचे उपायुक्त संदीप भाजीभाकरे यांच्याजवळ पोहोचला. तो म्हणाला,
“मी कृषिकेश रावले यांचा बॅचमेट आहे.”
या दाव्यांवर भाजीभाकरे यांनी त्याची ओळख पटवण्याचा प्रयत्न केला असता, वाघमोडे अडखळला आणि काहीच सांगू शकला नाही. संशय आल्यावर अधिक चौकशी करण्यात आली आणि तपासात धक्कादायक माहिती समोर आली.
वाघमोडे उर्फ सागर घोरपडे याच्यावर आधीच अहिल्यानगर कोतवाली पोलीस स्टेशन आणि हरिद्वार (उत्तराखंड) येथे तोतया आयपीएस अधिकारी बनून फसवणूक केल्याचे गुन्हे दाखल असल्याचे समोर आले. त्यामुळे पुणे पोलिसांनी त्वरित त्याला अटक करून पुढील चौकशी सुरू केली आहे.
पोलिसांनी दिलेली माहिती
या प्रकरणी भाविक जितेंद्र शहा यांनी तक्रार दाखल केली असून, फसवणूक, बनावट ओळख आणि सरकारी अधिकाऱ्यांची दिशाभूल या कलमांनुसार गुन्हा दाखल करण्यात आला आहे.
सागर वाघमोडेने या ‘खोट्या ओळखी’चा वापर करून अनेक ठिकाणी आपली प्रतिष्ठा निर्माण करण्याचा प्रयत्न केल्याची शक्यता पोलिसांनी व्यक्त केली आहे.
पुढील तपास
सध्या पोलिस त्याच्या संपर्कात आलेल्या इतर व्यक्तींची माहिती घेत आहेत. या प्रकरणात आणखी कोणी सहभागी आहे का, हेही तपासले जात आहे.
पोलिसांनी नागरिकांना सावध राहण्याचं आवाहन केलं आहे —
“सरकारी अधिकाऱ्यांची ओळख पडताळूनच विश्वास ठेवा. बनावट अधिकारी हे फसवणुकीसाठी नवी पद्धत वापरत आहेत.”
