‘सी लिंकपासून रिंग रोडपर्यंत – उज्ज्वल महाराष्ट्रासाठी भव्य पायाभूत क्रांती!’ मुख्यमंत्री देवेंद्र फडणवीस यांच्या अध्यक्षतेखाली अधोसंरचना समितीच्या बैठकीत महत्त्वाचे निर्णय
महाराष्ट्रात वाहतूक, संपर्क आणि विकास यांचा नवा अध्याय उलगडत आहे. मुख्यमंत्री देवेंद्र फडणवीस यांच्या अध्यक्षतेखाली आज अधोसंरचना समितीची बैठक पार पडली, ज्यामध्ये राज्यातील अनेक महत्त्वाच्या प्रकल्पांना हिरवा कंदील देण्यात आला. या बैठकीत महाराष्ट्राच्या भावी विकासाचा आराखडा अधिक स्पष्ट झाला आहे.
बैठकीत उत्तन–विरार सी लिंक प्रकल्पाचा विस्तार वधावन बंदरापर्यंत करण्यास मंजुरी देण्यात आली. हा निर्णय मुंबईच्या उत्तर-दक्षिण वाहतूक साखळीला अधिक बळकट करणार आहे. या ५५.१२ किमी लांबीच्या प्रकल्पात २४.३५ किमी मुख्य समुद्र मार्ग (सी लिंक) आणि उत्तन, वसई, विरार येथून वधावन बंदराशी जोडणारे जोडमार्ग बांधले जाणार आहेत.
मुख्यमंत्री फडणवीस यांनी सांगितले की, “मुंबईच्या उत्तर-दक्षिण कनेक्टिव्हिटीसाठी हे एक ऐतिहासिक पाऊल आहे. साऊथ कोस्टल रोड, बांद्रा-वर्ली सी लिंक, अटल सेतू यांसारखे प्रकल्प पूर्ण झाले असून आता वर्सोवा–बांद्रा सी लिंक, ऑरेंज गेट टनेल, नॉर्थ कोस्टल रोड आणि सेवरी–वर्ली एलिव्हेटेड कनेक्टर यांसारखे प्रकल्प वेगाने पूर्णत्वास जात आहेत.”
या सर्व प्रकल्पांमुळे महाराष्ट्राच्या किनारपट्टीपासून ते महानगरांपर्यंतचा प्रवास सुलभ, सुरक्षित आणि जलद होणार आहे. उत्तन–विरार सी लिंक आणि विरार–अलिबाग मल्टिमोडल कॉरिडॉर हे प्रकल्प मुंबईतील वाहतुकीवरील ताण मोठ्या प्रमाणात कमी करतील.
🔹 नाशिकमध्ये ६६ किमी ‘इनर रिंग रोड’ प्रकल्पालाही मंजुरी देण्यात आली आहे. आगामी कुंभमेळ्याच्या पार्श्वभूमीवर मार्च ते जून २०२७ दरम्यान हा प्रकल्प पूर्ण करण्याचे लक्ष्य आहे. नाशिक–त्र्यंबकेश्वर कुंभमेळा प्राधिकरण या प्रकल्पासाठी आवश्यक जमिनीचा ताबा घेणार आहे.
🔹 बैठकीत पुणे मेट्रोच्या विस्तारावरही सखोल चर्चा करण्यात आली. हडपसर–लोणी काळभोर आणि हडपसर बस डेपो–सासवड मार्गांना पुरंदर विमानतळाशी जोडण्यासाठी बोगद्याच्या माध्यमातून कनेक्टिव्हिटी देण्याचे निर्देश देण्यात आले. तसेच सहा डब्यांच्या नवीन मेट्रो ट्रेनमुळे पुण्यातील प्रवासी क्षमतेत मोठी वाढ होणार आहे.
मुख्यमंत्री फडणवीस यांनी म्हटलं, “या सर्व प्रकल्पांमुळे महाराष्ट्राची अधोसंरचना जागतिक दर्जाची होईल. नागरिकांच्या जीवनमानात अभूतपूर्व सुधारणा घडेल आणि ‘नव्या महाराष्ट्राचा’ पाया अधिक भक्कम होईल.” या बैठकीला उपमुख्यमंत्री एकनाथ शिंदे, उपमुख्यमंत्री अजितदादा पवार, मंत्री चंद्रशेखर बावनकुळे, मंत्री शिवेंद्रसिंह राजे भोसले यांच्यासह अनेक मान्यवर उपस्थित होते.
