पुणे : राज्यभरात वाहनचालकांसाठी एक अत्यंत महत्त्वाचा नियम आता अंतिम टप्प्यात आहे. महाराष्ट्र सरकारने जाहीर केल्यानुसार, ३० नोव्हेंबर २०२५ ही HSRP (High Security Registration Plate) बसविण्याची शेवटची तारीख निश्चित करण्यात आली आहे. या तारखेनंतर ज्यांच्या वाहनावर HSRP नंबर प्लेट नसेल, त्यांच्यावर थेट कारवाई होणार आहे.
HSRP नंबर प्लेट म्हणजे काय?
ही नंबर प्लेट साध्या लोखंडी किंवा प्लास्टिकच्या पाटीपेक्षा पूर्णतः वेगळी आहे. अॅल्युमिनियमपासून बनविलेली, हॉट-स्टॅम्प्ड क्रोम कोड आणि युनिक आयडी असलेली ही प्लेट वाहनाच्या नोंदणी क्रमांकाशी थेट जोडलेली असते. त्यामुळे चोरी, बनावट नंबर, आणि गैरवापर रोखण्यास मोठी मदत होते.
राज्यातील अनेक वाहनधारकांनी अजूनही ही प्लेट बसवलेली नाही. सोलापूर जिल्ह्यातील तब्बल ७ लाखांहून अधिक वाहने अजूनही HSRPशिवाय धावत आहेत. यामुळे परिवहन विभागाने स्पष्ट इशारा दिला आहे की, ३० नोव्हेंबरनंतर कोणतीही मुदत वाढ दिली जाणार नाही.
HSRP नसल्यास दंड किती?
मुदतीनंतर जर वाहनावर HSRP नसल्याचे आढळले, तर मोटार वाहन कायद्याच्या कलम १७७ नुसार पहिल्यांदा ₹१,००० दंड आकारला जाईल, आणि पुन्हा चूक झाल्यास हा दंड ₹१०,००० पर्यंत वाढू शकतो. काही प्रकरणांमध्ये वाहन जप्त करण्याची शक्यता देखील आहे.
HSRP कशी मिळवायची?
वाहनधारकांनी transport.maharashtra.gov.in या संकेतस्थळावर जाऊन आपल्या वाहनाची माहिती भरून, नजिकच्या फिटमेंट सेंटरवर अपॉइंटमेंट बुक करणे आवश्यक आहे. ठरलेल्या तारखेला जाऊन प्लेट बसवून घेणे बंधनकारक आहे.
HSRP चे फायदे:
-
वाहन चोरी झाल्यास शोध घेणे सुलभ
-
बनावट नंबर प्लेट वापरणाऱ्यांवर नियंत्रण
-
पोलिस व आरटीओ तपासणीमध्ये पारदर्शकता
-
राष्ट्रीय स्तरावर एकसमान नोंदणी प्रणाली
