नाशिक शहरातील एका दांपत्याने ओळखीच्या लोकांना तब्बल २.२५ कोटी रुपयांचा गंडा घालून शहरात खळबळ उडवली आहे. खोट्या ‘आयकर विभाग’ छाप्याची कथा रचून संशयितांनी पैशांची उकळपट्टी केली. आर्थिक गुन्हे शाखेने आरोपी ऋषिराज टेकाडे याला अटक केली असून, त्याची पत्नी रविना टेकाडे फरार असून पोलिस तिचा शोध घेत आहेत.
तक्रारदार ज्ञानेश्वर संपतराव तिडके (रा. दिंडोरी) यांच्याकडून सुरुवात झाली. संशयिताने तिडके यांना सांगितले की, आयकर विभागाने घरावर छापा टाकून ₹६ कोटी जप्त केले आणि कोटक महिंद्रा बँकेतील ₹७०० कोटींचे खाते गोठवले आहे. या बहाण्याने कुटुंबाच्या रोजच्या खर्चासाठी मदत म्हणून ₹५० लाख मागितले.
विश्वास ठेऊन तिडके यांनी ₹६५.३९ लाख दिले, परंतु त्यातून फक्त ₹१.३० लाख परत मिळाले. उर्वरित रक्कमेबाबत वारंवार विचारणा केल्यावर संशयिताने टाळाटाळ केली. त्यानंतर तिडके यांनी थेट सरकारवाडा पोलीस ठाण्यात धाव घेतली.
चौकशीत उघडकीस आले की, टेकाडे दांपत्याने एकूण ३ जणांकडून तब्बल ₹२.२५ कोटी उकळले. आर्थिक गुन्हे शाखेने ऋषिराज टेकाडेला अटक केली असून रविना टेकाडे फरार आहे. पोलिस तिचा शोध तीव्र गतीने घेत आहेत.
