पुणे शहर पोलिसांकडून नागरिकांशी थेट संवाद वाढवण्यासाठी एक महत्वाचे पाऊल उचलण्यात आले आहे. पुणे पोलीस आयुक्तालयातील गुन्हे शाखेने एक अभिनव उपक्रम सुरू केला आहे, ज्यामध्ये पोलीस परिमंडळाचे उप-आयुक्त स्वतः पोलीस ठाण्यांमध्ये हजर राहून प्रलंबित गुन्हे व तक्रारी अर्जांच्या निपटाऱ्यासंदर्भात मार्गदर्शन करणार आहेत.
पोलीस ठाण्यांना भेट देणार पोलीस उप-आयुक्त
हा उपक्रम मंगळवार, २९ जुलै ते गुरुवार, ३१ जुलै २०२५ दरम्यान राबवण्यात येणार आहे. यामध्ये प्रत्येक परिमंडळाचे पोलीस उप-आयुक्त तीन दिवस आपापल्या अधिपत्याखालील पोलीस ठाण्यांना भेट देतील, आणि तिथे असलेल्या प्रलंबित गुन्हे व तक्रारी अर्जांची तपासणी व मार्गदर्शन करतील.
पुणे पोलिसांनी स्पष्ट केले आहे की ज्यांच्या तक्रारी किंवा गुन्हे पोलीस स्टेशनमध्ये प्रलंबित आहेत, त्यांनी संबंधित दिवशी पोलीस ठाण्यात उपस्थित राहावे. नागरिक आणि पोलिसांमधील सुसंवाद वाढवण्यासाठी आणि प्रलंबित प्रकरणांचा निपटारा जलद गतीने करण्यासाठी ही एक महत्वपूर्ण संधी आहे.
नागरिकांसाठी महत्त्वाचे फायदे
तक्रारी थेट वरिष्ठ अधिकाऱ्यांकडे मांडण्याची संधी
गुन्ह्यांच्या तपास प्रक्रियेचा आढावा
स्थानिक पोलीस ठाण्याचे कार्यप्रणाली समजून घेण्याची संधी
