मुंबई :- मुंबईतील ग्लॅमरस जगतात पुन्हा एकदा फसवणुकीचा प्रकार समोर आला आहे. अभिनेत्री रुचि गुज्जर हिने हिंदी चित्रपट ‘So Long Valley’ च्या निर्माता करण सिंह चौहान याच्याविरोधात धोखाधडी, गुन्हेगारी विश्वासघात आणि धमकी देण्याचे गंभीर आरोप करत FIR नोंदवली आहे. प्रकरण तब्बल २४ लाख रुपयांच्या आर्थिक व्यवहाराशी संबंधित असून या घटनेने मनोरंजन विश्वात खळबळ उडवली आहे.
सह-निर्मात्याच्या नावाखाली २४ लाखांचा घोटाळा?
रुचि गुज्जर यांनी पोलिसांना दिलेल्या तक्रारीनुसार, करण सिंह चौहान याने तिला एका हिंदी टेलिव्हिजन सीरियलच्या सह-निर्मात्यापदी सहभागी होण्याचं आमंत्रण दिलं. या व्यवहारासाठी त्याने काही कागदपत्रे व करार दाखवले, ज्यावर विश्वास ठेवून रुचिने काही वेगवेगळ्या बँक खात्यांमध्ये टप्प्याटप्प्याने २४ लाख रुपये ट्रान्सफर केले.
पण त्या प्रोजेक्टवर कोणतंही प्रत्यक्ष काम सुरू झालं नाही. जेव्हा रुचिने चौहानशी वारंवार संपर्क साधण्याचा प्रयत्न केला, तेव्हा त्याने टाळाटाळ, खोटी माहिती आणि धमकी देण्यास सुरुवात केली.
या प्रकरणानंतर रुचि गुज्जरने करण सिंह चौहानच्या कार्यालयाबाहेर तीव्र हंगामा केला, आणि याचा व्हिडीओ समाजमाध्यमांवर व्हायरल झाला आहे. अनेकांनी तिच्या धैर्याचे कौतुक केले असून, मनोरंजन विश्वात अशा फसवणूक प्रकारांबाबत कडक कारवाईची मागणी केली आहे.
पोलिसांचा तपास सुरू, चौहानविरुद्ध गुन्हे नोंद
रुचिच्या तक्रारीनंतर पोलिसांनी IPC कलमांतर्गत फसवणूक (धोखाधडी), विश्वासघात व धमकीचे गुन्हे नोंद केले आहेत. संबंधित खात्यांतील आर्थिक व्यवहार, कागदपत्रे आणि ईमेल्स तपासले जात आहेत. लवकरच करण सिंह चौहानला समन्स पाठवले जाऊ शकते, अशी माहिती सूत्रांकडून मिळाली आहे.
मनोरंजन क्षेत्रात फसवणुकीचे प्रमाण वाढले?
अशा प्रकारच्या घटना नवीन नाहीत. अनेक नवोदित कलाकार, निर्माते व क्रिएटिव्ह प्रोफेशनल्स गैरवापर, खोटी आश्वासने आणि आर्थिक शोषणाला बळी पडत आहेत. त्यामुळे इंडस्ट्रीमधील व्यवहार अधिक पारदर्शक आणि कायदेशीररित्या बांधील असावेत, अशी मागणी जोर धरत आहे.
