वैष्णवी हगवणे मृत्यू प्रकरण : सात दिवसांच्या शोधानंतर अखेर सासरे राजेंद्र हगवणे व दीर सुशील हगवणे यांना अटक!

मुंबई | पुणे | पिंपरी-चिंचवड :- मुळशी तालुक्यातील वैष्णवी हगवणे यांचा संशयास्पद मृत्यू प्रकरण पुन्हा एकदा चांगलंच गाजू लागलं आहे. तब्बल सात दिवसांपासून फरार असलेले आणि पोलिसांच्या शोधाची ससेमिरा झालेल्या राजेंद्र हगवणे (सासरे) आणि सुशील हगवणे (दीर) यांना आज पहाटे अटक करण्यात आली. ही कारवाई पिंपरी-चिंचवड पोलिसांनी स्वारगेट परिसरातून केली.

राजेंद्र हगवणे हे तळेगावमधील एका हॉटेलमध्ये सीसीटीव्हीमध्ये आढळून आले होते, त्यामुळे पोलिसांची खात्री पटली आणि आज पहाटे ४.३० च्या सुमारास दोघांनाही अटक करण्यात आली. पोलिसांची तब्बल सहा विशेष पथकं आरोपींचा माग काढत होती. सूत्रांच्या माहितीनुसार, लवकरच पोलिसांकडून पत्रकार परिषद घेऊन अधिकृत माहिती जाहीर करण्यात येणार आहे.

प्रकरणाचं मूळ काय?

पुणे जिल्ह्यातील मुळशी तालुक्यात राहणारी वैष्णवी हगवणे या तरुणीचा संशयास्पद मृत्यू झाला होता. सुरुवातीला हा आत्महत्येचा प्रकार असल्याचं भासवलं गेलं, मात्र शवविच्छेदन अहवालात तिच्या शरीरावर गंभीर मारहाणीच्या खुणा आढळून आल्या. यामुळे संशय अधिकच बळावला.

वैष्णवीच्या आई-वडिलांनी गंभीर आरोप करत सांगितले की, तिचा हुंड्यासाठी छळ केला जात होता आणि त्यातूनच तिची हत्या झाली आहे. या तक्रारीनंतर पिंपरी-चिंचवड पोलिसांनी तत्काळ गुन्हा दाखल करून तपास सुरू केला.

या प्रकरणात वैष्णवीचा पती शशांक, नणंद करिश्मा आणि सासू लता हगवणे यांना आधीच अटक करण्यात आली होती. आता सासरे राजेंद्र आणि दीर सुशील यांचाही पर्दाफाश झाला आहे.

या घटनेमुळे केवळ मुळशीच नव्हे तर पुणे आणि पिंपरी-चिंचवड परिसरात प्रचंड खळबळ उडाली आहे. महिला सुरक्षा, हुंडा प्रतिबंधक कायदा, आणि कुटुंबीयांचे मानसिक छळ या मुद्द्यांवरून या प्रकरणाने पुन्हा एकदा गंभीर प्रश्न उपस्थित केले आहेत.

राजकीय व सामाजिक क्षेत्रातील व्यक्तींनीही या प्रकरणात उघडपणे प्रतिक्रिया दिल्या आहेत. काही महिला संघटनांनी या घटनेचा निषेध करून न्यायालयीन तपास जलदगतीने पार पडावा अशी मागणी केली आहे.