“पुणे वाहतूक पोलीस अॅकेडमी”च्या प्रशिक्षण सत्राने घेतली अभूतपूर्व भरारी; १००% अधिकारी आणि अंमलदार प्रशिक्षित!”

पुणे: पुणे शहर वाहतूक पोलीस दलाच्या क्षमतेत लक्षणीय वाढ घडवून आणण्यासाठी “पुणे वाहतूक पोलीस अॅकेडमी” ही संकल्पना यशस्वीरित्या प्रत्यक्षात आणण्यात आली आहे. मा. पोलीस आयुक्त, पुणे शहर यांच्या कल्पनेतून आणि मा. अपर पोलीस आयुक्त (पूर्व प्रादेशिक विभाग), पुणे शहर, श्री मनोज पाटील यांच्या मार्गदर्शनाखाली, दिनांक २३ फेब्रुवारी २०२५ ते १० मे २०२५ या कालावधीत तब्बल १८ प्रशिक्षण सत्रांचे आयोजन करण्यात आले.

या विशेष प्रशिक्षण मोहिमेत पुणे शहर वाहतूक शाखेतील १००% अधिकारी व अंमलदार (एकूण ६३ पोलीस अधिकारी आणि १०४५ पोलीस अंमलदार) यांना सखोल प्रशिक्षण देण्यात आले. या उपक्रमात वाहन वाहतूक नियंत्रण, सॉफ्ट स्किल्स, मानसोपचार, नियमांचे पालन, ग्रीन कॉरिडोर, व्हिव्हीआयपी कॅन्व्हॉय व्यवस्थापन, सीपीआर, ई-चलान पद्धतीसह अत्याधुनिक आणि व्यावसायिक विषयांचा समावेश होता.

प्रशिक्षणात समाविष्ट महत्त्वाचे घटक:

• सॉफ्ट स्किल्स आणि मानसशास्त्रीय दृष्टिकोन: नागरिकांशी संवाद, सहानुभूतीपूर्ण व्यवहार

• वाहतूक कायद्याचे सखोल ज्ञान: मोटार वाहन कायदा, रस्ता वाहतूक नियम

• अत्यावश्यक सेवा प्रक्रियेचे ज्ञान: ग्रीन कॉरिडोर, व्हीव्हीआयपी कॅनव्हॉय, फायर ब्रिगेड

• प्राथमिक उपचार (CPR) व अपघात व्यवस्थापन

• ई-चलान प्रात्यक्षिक प्रशिक्षण

 सहयोग व मान्यवर प्रशिक्षक:

या कार्यक्रमात Weikfield Foods Pvt. Ltd. चे CEO अश्विनी मल्होत्रा, Top Management Consortium Foundation चे डायरेक्टर अजय अगरवाल, Elephant Connectच्या मंजिरी गोखले यांच्यासह अनेक तज्ज्ञ व्यक्तींनी सहकार्य केले.

प्रशिक्षकांच्या यादीत श्री मनोज पाटील, श्री सुरेश गोखले, डॉ. श्याम गायकवाड (जहांगीर हॉस्पिटल), RTO अधिकारी अनिल पंतोजी, प्रकाश जाधव, अशोक शिंदे, तसेच सिनी. स. पो. आ. महादेव गावडे, विजय पळसुले, सुरेंद्र देशमुख यांच्यासारख्या दिग्गजांचा समावेश होता.

 भविष्यातील योजना:

या अॅकेडमीद्वारे भविष्यात तांत्रिक प्रशिक्षणाचा विस्तार केला जाणार असून, पोलीस व नागरिक यांच्यातील संवाद वाढविण्यासाठी नव्या विषयांचा समावेश करण्यात येणार आहे. या अॅकेडमीमुळे पुणे शहरातील वाहतूक व्यवस्थापन अधिक कुशल, शिस्तबद्ध व आधुनिक पद्धतीने राबवले जाणार आहे.

आवाहन:
पुणेकर नागरिकांना सुरक्षित, सुस्थितीत व पर्यावरणपूरक वाहतुकीचा अनुभव मिळावा यासाठी प्रशिक्षण घेतलेल्या वाहतूक पोलीसांचा पुढाकार अत्यंत महत्त्वाचा ठरणार आहे. या अॅकेडमीमुळे “स्मार्ट सिटी पुणे” या संकल्पनेला बळकटी मिळणार असून इतर शहरांसाठीही हे मॉडेल आदर्श ठरेल.