नवी दिल्ली – जम्मू आणि काश्मीरमधील पहलगाम येथे झालेल्या भ्याड दहशतवादी हल्ल्याने संपूर्ण देश हळहळला असताना, आता या हल्ल्यामागील सूत्रधारांना लवकरच योग्य आणि चोख प्रत्युत्तर दिले जाईल, असे ठाम आश्वासन संरक्षण मंत्री राजनाथ सिंह यांनी दिले आहे.
नवी दिल्लीत आयोजित करण्यात आलेल्या भारतीय हवाई दलाचे मार्शल अर्जन सिंग यांच्या स्मृति व्याख्यानात बोलताना राजनाथ सिंह यांनी भारताच्या दहशतवादाविरुद्धच्या शून्य सहनशीलतेच्या भूमिकेचा पुनरुच्चार केला. त्यांनी स्पष्टपणे सांगितले की, “भारतासारख्या प्राचीन आणि बलाढ्य राष्ट्राला अशा भ्याड दहशतवादी कारवायांनी कधीही डिवचता येणार नाही. प्रत्येक भारतीय या क्रूर घटनेविरोधात एकवटला आहे.”
राजनाथ सिंह यांनी पुढे सांगितले की, “ज्यांनी हल्ला केला त्यांच्यापर्यंतच नव्हे, तर जे लोक पडद्यामागे राहून भारतीय भूमीवर कुटील कट रचत आहेत, त्यांनाही योग्य उत्तर दिले जाईल.” पंतप्रधान नरेंद्र मोदी यांच्या नेतृत्वाखाली केंद्र सरकार आवश्यक ती सर्व पावले उचलणार असून, देशाच्या सुरक्षेसाठी कुठलीही कसर ठेवली जाणार नाही, असे त्यांनी ठामपणे सांगितले.
सीमेपलीकडून होत असलेल्या दहशतवादी कारवायांविषयी बोलताना राजनाथ सिंह म्हणाले की, “इतिहास साक्षी आहे की राष्ट्रांचा विनाश हा त्यांच्या शत्रूंमुळे नाही, तर स्वतःच्या दुष्कृत्यांमुळे होतो. आजच्या काळातही हेच घडते आहे. शेजारी राष्ट्रांनी या इतिहासाचा अभ्यास करावा.”
या हल्ल्यात ज्या निष्पाप नागरिकांचा जीव गेला, त्यांच्याप्रती त्यांनी तीव्र शोकसंवेदना व्यक्त केल्या. “धर्माच्या नावाखाली असा अमानवी हल्ला होणे ही अत्यंत निंदनीय गोष्ट आहे. संपूर्ण देश या दु:खात सहभागी आहे,” असेही त्यांनी सांगितले.
या व्याख्यानानंतर राजनाथ सिंह यांनी भारतीय हवाई दलाचे मार्शल अर्जन सिंग यांना श्रद्धांजली अर्पण केली. त्यांचे नेतृत्व, दूरदृष्टी आणि निष्ठा भारतीय लष्करासाठी प्रेरणादायी असल्याचे गौरवोद्गार त्यांनी काढले. “आज भारतीय हवाई दल जागतिक स्तरावर सर्वोच्च स्थानावर पोहोचले आहे, यामागे अर्जन सिंग यांसारख्या नेत्यांचे योगदान आहे,” असे ते म्हणाले.
देशभरातून आता केंद्र सरकारच्या या भूमिकेचे स्वागत होत असून, दहशतवाद्यांना धडा शिकवण्याची मागणी अधिक तीव्र झाली आहे. जनतेच्या मनातही आता आश्वस्तता निर्माण झाली आहे की देशाच्या सुरक्षेसाठी सरकार सजग आणि सक्षम आहे.
