पिंपरी – सामाजिक बांधिलकीचा आदर्श निर्माण करणारी कोकण खेड युवाशक्ती सामाजिक संस्था आपल्या सातव्या वर्धापन दिनानिमित्त एक प्रेरणादायी उपक्रम घेऊन येत आहे. रविवार, दिनांक 20 एप्रिल 2025 रोजी संस्था एक भव्य रक्तदान शिबीर, हळदीकुंकू, लकी ड्रॉ आणि सांस्कृतिक कार्यक्रम यांचे आयोजन करणार असून या कार्यक्रमात हजारो कोकणवासीय सहभागी होणार आहेत.
या कार्यक्रमाबाबत माहिती देताना संस्थेचे अध्यक्ष संदिप साळुंखे यांनी सांगितले की, “मागील सात वर्षांपासून कोकण खेड युवाशक्ती सामाजिक कामात सातत्याने कार्यरत आहे. गरजूंना मदतीचा हात देणे, आरोग्य सेवा पोहोचवणे, तसेच कोकणवासीयांना एकत्र आणणे, हे आमचे मुख्य उद्दिष्ट राहिले आहे.”
सांस्कृतिक कार्यक्रम, सामाजिक एकत्रिकरण आणि आरोग्य विषयक उपक्रम यांचे सुंदर मिश्रण असलेला हा कार्यक्रम श्री दत्तमंदिर सांस्कृतिक हॉल, संभाजीनगर, थरमॅक्स चौक, चिंचवड येथे पार पडणार आहे.
📍 रक्तदान शिबीर: सकाळी 9 ते 12 📍 सांस्कृतिक कार्यक्रम आणि स्नेहमेळावा: सायंकाळी 5 ते 9
विशेषतः महिलांसाठी हळदीकुंकू समारंभ आणि आकर्षक लकी ड्रॉ याचे आयोजन करण्यात आले असून, संपूर्ण कुटुंबासाठी एक सामाजिक, सांस्कृतिक आणि प्रेरणादायी अनुभव घेण्याची संधी आहे.
साळुंखे यांनी सर्व कोकणवासीयांना आणि पिंपरी-चिंचवडकरांना आवाहन केले आहे की, “सामाजिक एकात्मतेचा आणि सेवाभावी कार्याचा हा सोहळा अधिक तेजस्वी करण्यासाठी आपली उपस्थिती अनिवार्य आहे. रक्तदान करून तुम्ही कोणाच्यातरी जीवनाला नवीन दिशा देऊ शकता.”
या उपक्रमाद्वारे युवकांमध्ये सामाजिक जाणिवा जागृत करण्यासह, कोकणवासीयांच्या एकतेचे प्रतीक ठरावा असा उद्देश संस्थेचा आहे.
कोकण खेड युवाशक्तीचा समाजहिताचा संकल्प! 20 एप्रिलला रक्तदान, हळदीकुंकू आणि स्नेहमेळाव्याचे आयोजन
