पुणे – महाराष्ट्र सरकारच्या ‘१०० दिवसांच्या कार्यक्रमांतर्गत’ पुणे पोलिसांनी ऐतिहासिक निर्णय घेत ९६२ बेवारस आणि बिनधनी वाहने लिलाव करून शहरातील पोलिस ठाण्यांचे परिसर स्वच्छ केले आहेत. या निर्णयामुळे पोलिस ठाण्यांभोवती वाढत चाललेला कचरा, जागेचा अपुरा वापर आणि नागरिकांच्या होणाऱ्या गैरसोयीला मोठा दिलासा मिळाला आहे.
मुख्यमंत्र्यांच्या आदेशानुसार स्वच्छतेची मोहीम!
मुख्यमंत्री देवेंद्र फडणवीस यांनी १०० दिवसांच्या कार्यक्रमांतर्गत सरकारी कार्यालये आणि परिसर स्वच्छ ठेवण्याच्या सूचना दिल्या होत्या. याच अनुषंगाने पुणे पोलीस आयुक्तालयाने शहरातील सर्व पोलीस ठाण्यांची पाहणी केली असता, अनेक पोलीस ठाण्यांच्या परिसरात वर्षानुवर्षे बेवारस वाहने पडून असल्याचे निदर्शनास आले. काही ठिकाणी तर पोलिस ठाण्यांबाहेरही ही वाहने ठेवली जात होती, ज्यामुळे नागरिकांना व पोलिसांनाही अडथळा निर्माण होत होता.
पुणे पोलिस आयुक्तालयाने तातडीने उपाययोजना हाती घेत, शहरातील ३९ पोलीस ठाण्यांमधील आणि वाहतूक विभागाच्या मालकीची असलेली ही बेवारस वाहने हटवण्यासाठी नियोजन सुरू केले.
असा पार पडला वाहन लिलावाचा महत्त्वपूर्ण टप्पा
प्रथम, पोलिस ठाण्यातील वाहने रेकॉर्ड करून त्याबाबत जाहिरात आणि प्रसिद्धीपत्रक प्रसिद्ध करण्यात आले. त्यानंतर, वाहन मालकांना संपर्क करण्याची मोहीम राबविण्यात आली. जर मालक सापडले नाहीत, तर न्यायालयाच्या आदेशाने लिलाव प्रक्रियेस मंजुरी मिळवण्यात आली. MSTC (मेटल स्क्रॅप ट्रेड कॉर्पोरेशन) या केंद्र शासनाच्या अधिकृत संस्थेमार्फत १९ मार्च २०२५ रोजी ई-लिलाव पद्धतीने ही वाहने विक्रीस ठेवण्यात आली. अखेर ७ एप्रिल २०२५ पासून MSTC ने वाहने ताब्यात घेण्यास सुरुवात केली. १३ एप्रिलपर्यंत ही सर्व वाहने स्क्रॅपसाठी पाठवण्यात येणार आहेत.
पोलीस ठाण्यांचे आवार आता अधिक सुशोभित!
या निर्णयामुळे पुणे शहरातील पोलिस ठाण्यांचे परिसर अधिक स्वच्छ आणि प्रशस्त झाले आहेत. आधी ही वाहने पडून राहिल्यामुळे पोलिस ठाण्यांचा परिसर बकाल आणि अस्वच्छ झाला होता. यामुळे नागरिकांना पोलीस ठाण्यात येताना अडचणी येत होत्या. परंतु या मोहिमेमुळे पोलीस ठाण्यांची मोठी जागा रिकामी झाली असून नागरिकांना आता स्वच्छ आणि व्यवस्थित वातावरण मिळणार आहे.
या संपूर्ण मोहिमेत महत्त्वाची भूमिका निभावणारे अधिकारी –
🔸 पोलीस आयुक्त – अमितेश कुमार 🔸 पोलीस सह आयुक्त – रंजनकुमार शर्मा 🔸 अपर पोलीस आयुक्त (पूर्व विभाग) – मनोज पाटील 🔸 अपर पोलीस आयुक्त (पश्चिम विभाग) – प्रविण पाटील 🔸 अपर पोलीस आयुक्त (प्रशासन) – अरविंद चावरिया 🔸 पोलीस उपायुक्त, वाहतूक विभाग – अमोल झेंडे 🔸 पोलीस निरीक्षक (वाहतूक) – महेश बोळकोटगी
पुणेकरांनी दिली पुणे पोलिसांना दाद!
या ऐतिहासिक निर्णयामुळे पुणेकरांमध्ये समाधानाची भावना असून, नागरिकांनी पुणे पोलिसांचे भरभरून कौतुक केले आहे. पोलीस ठाण्यांमध्ये गेल्यावर मोकळी आणि स्वच्छ जागा मिळाल्याने तक्रारदारांना अधिक चांगला अनुभव मिळणार आहे.
🔹 पोलिस ठाणे आता अधिक स्वच्छ आणि सुशोभित 🔹 वाहतुकीला मिळणार मोठा दिलासा 🔹 पोलिसांनाही मोकळ्या जागेचा होणार उपयोग
