पुणे: महिलांच्या संघर्षाला आणि त्यांच्या कर्तृत्वाला सलाम करण्यासाठी शिवसेना उद्धव बाळासाहेब ठाकरे गट पुणे काँटोन्मेंट विधानसभा मतदारसंघाचे विभाग प्रमुख व मोरया प्रतिष्ठानचे प्रमुख श्रीयुत राजेंद्र पुंडलिक मोरे यांच्या वतीने जागतिक महिला दिन 2025 निमित्ताने भव्य सत्कार सोहळ्याचे आयोजन करण्यात आले. हा कार्यक्रम पुण्यातील ऐतिहासिक लाल महाल येथे मोठ्या उत्साहात पार पडला.
कर्तृत्वाचा सन्मान, समाजसेवेला मान्यता!
या कार्यक्रमात कसबा संस्कार केंद्र आणि हिंदवी महिला ग्रुपच्या वतीने करण्यात येणाऱ्या सामाजिक, सांस्कृतिक व शैक्षणिक कार्याची दखल घेऊन विशेष सत्कार करण्यात आला. यामध्ये कसबा संस्कार केंद्राच्या प्रमुख संयोजक व हिंदवी महिला गटाच्या प्रमुख अनघा अनिल दिवाणजी यांचा विशेष सत्कार शिवसेना उद्धव ठाकरे गटाचे पुणे शहर प्रमुख संजय दादा मोरे यांच्या हस्ते करण्यात आला.
“समाजातील महिलांनी विविध क्षेत्रांमध्ये ठसा उमटवला आहे. त्यांच्या मेहनतीमुळे संपूर्ण समाजाला दिशा मिळते. महिलांचा सन्मान करणे ही आपल्या संस्कृतीची ओळख आहे.” – संजय दादा मोरे
५० हून अधिक महिलांचा गौरव!
या भव्य सोहळ्यात परिसरातील ५० हून अधिक महिलांचा सन्मान करण्यात आला. शिक्षण, समाजकार्य, उद्योजकता, आरोग्य, कला आणि क्रीडा अशा विविध क्षेत्रात उल्लेखनीय कामगिरी करणाऱ्या महिलांचा मान्यवरांच्या हस्ते सत्कार करण्यात आला.
सत्कार स्वीकृत करताना अनघा अनिल दिवाणजी म्हणाल्या, “हा सन्मान माझ्यासाठी केवळ पुरस्कार नसून, माझ्या कार्याची पावती आहे. समाजातील गरजू आणि वंचितांसाठी सतत कार्यरत राहण्याची प्रेरणा या सन्मानाने मिळते. या गौरवासाठी माननीय संजय दादा मोरे आणि राजेंद्र पुंडलिक मोरे यांचे मनःपूर्वक आभार!”
महिला सबलीकरणाच्या दिशेने पुढचे पाऊल!
या सोहळ्यात महिलांच्या हक्कांवर आणि सबलीकरणावर विशेष चर्चा करण्यात आली. महिलांनी आत्मनिर्भर होण्यासाठी समाजाने त्यांना पाठिंबा द्यावा, असे मत यावेळी मान्यवरांनी व्यक्त केले.
महिला दिनानिमित्त पुण्यात झालेल्या या भव्य सत्कार सोहळ्याने महिलांच्या कर्तृत्वाला दाद मिळाली असून, हा उपक्रम महिलांना पुढे जाण्यासाठी नक्कीच प्रेरणादायी ठरेल.
