पुण्यातील स्वारगेट बस स्थानकात 26 वर्षीय तरुणीवर झालेल्या अमानुष अत्याचार प्रकरणातील फरार आरोपी दत्ता गाडे (Dattatray Gade) याला अखेर पुणे पोलिसांनी शुक्रवारी रात्री दीडच्या सुमारास अटक केली. तब्बल 70 तास पोलिसांना गुंगारा देणाऱ्या या आरोपीला पकडण्यासाठी पोलिसांनी श्वान पथक, ड्रोन आणि मोठ्या संख्येने अधिकारी-कर्मचारी तैनात केले होते. विशेष म्हणजे, ग्रामस्थांच्या मदतीने हा आरोपी पोलिसांच्या ताब्यात आला.
आरोपी तब्बल तीन दिवस पोलिसांना गुंगारा देत होता
स्वारगेट बस स्थानकात अत्याचार घडवल्यानंतर आरोपी दत्ता गाडे हा थेट शिरूर तालुक्यातील गणोट गावात पळून गेला होता. गुन्हा दाखल होताच पोलिसांनी वेगवान हालचाली सुरू केल्या. परंतु आरोपी अत्यंत हुशारीने गावाजवळील एका उसाच्या शेतात लपून बसला होता. तीन दिवसांहून अधिक काळ तो पोलिसांना चकवा देण्यात यशस्वी ठरला.
ड्रोन आणि श्वान पथकाच्या मदतीने शोधमोहीम
पुण्याचे पोलिस आयुक्त अमितेश कुमार (Amitesh Kumar) यांच्या मार्गदर्शनाखाली तब्बल 500 पोलिस अधिकारी आणि कर्मचारी या शोध मोहिमेत गुंतले होते. विशेष म्हणजे, 500 हून अधिक स्थानिक नागरिकांनी देखील पोलिसांना सहकार्य केले. आरोपीचा माग काढण्यासाठी डॉग स्कॉड आणि ड्रोनचा मोठ्या प्रमाणात वापर करण्यात आला. डॉग स्कॉडला आरोपीच्या अस्तित्वाचे विविध पुरावे दिले गेले होते, तसेच ड्रोनच्या मदतीने उसाच्या शेतात सर्वेक्षण करण्यात आले.
71 सीसीटीव्ही फुटेजच्या आधारे ओळख पटली
पोलिसांनी या प्रकरणाच्या तपासात मोठ्या प्रमाणात आधुनिक तंत्रज्ञानाचा वापर केला. आरोपी कोण आहे, हे शोधण्यासाठी पोलिसांनी तब्बल 71 सीसीटीव्ही फुटेज तपासले. त्यात 23 फुटेज हे बस स्थानकातील तर 48 फुटेज बस स्थानकाबाहेरील होते. त्यातूनच आरोपीचा माग काढण्यात आला.
पाणी पिण्यासाठी आला आणि सापडला!
गुरुवारी रात्री 10.30 वाजता आरोपी दत्ता गाडे आपल्या नातेवाईक महेश बहीरट यांच्या घरी आला होता. त्याने नातेवाईकांकडून पाण्याची बाटली घेतली आणि गुन्ह्याची कबुली दिली. मात्र, लवकरच तो नातेवाईकांच्या घराजवळील एका बेबी कॅनॉलमध्ये लपून बसला. मात्र, पोलिसांनी त्याच्या हालचालींवर बारीक लक्ष ठेवले होते. शेवटी ग्रामस्थांनी त्याला पाहिले आणि लगेच पोलिसांना कळवले. अखेर शुक्रवारी मध्यरात्री पोलिसांनी त्या कॅनॉलजवळून आरोपीला बेड्या ठोकल्या.
फास्ट ट्रॅक कोर्टात खटला, त्वरित शिक्षा देण्याचे आदेश
पोलिसांनी आरोपीला शुक्रवारी रात्री 1 वाजून 10 मिनिटांनी अटक करून पुण्यात आणले. आरोपीविरुद्ध फास्ट ट्रॅक कोर्टात खटला चालवण्याचा निर्णय घेण्यात आला आहे. त्यामुळे या क्रूर कृत्याला त्वरित न्याय मिळण्याची शक्यता आहे.
नागरिकांचे विशेष सन्मान
पत्रकार परिषदेत पुण्याचे पोलिस आयुक्त अमितेश कुमार यांनी स्थानिक नागरिकांचे विशेष आभार मानले. ‘ग्रामस्थांनी दिलेल्या मदतीमुळे आरोपीला लवकरात लवकर पकडणे शक्य झाले. आम्ही त्या गावात जाऊन ज्या नागरिकांनी मदत केली त्यांचा विशेष सत्कार करणार आहोत,’ असे त्यांनी जाहीर केले.
महिलांच्या सुरक्षेसाठी ‘सेफनेट’ उपक्रमाची घोषणा
या घटनेनंतर महिलांच्या सुरक्षिततेसाठी आणखी कठोर पावले उचलण्याचा निर्णय घेण्यात आला आहे. अंधारात असलेल्या भागांमध्ये रस्त्यावरील दिवे वाढवण्यासाठी ‘सेफनेट’ (SafeNet) हा विशेष उपक्रम राबवण्यात येणार आहे. ‘महिला सुरक्षेसाठी सेफ्टी ऑडिट आधीच सुरू करण्यात आले आहे आणि महानगरपालिकेसोबत समन्वय साधून स्ट्रिटलाईट वाढवण्याचे नियोजन सुरू आहे,’ असेही पोलिस आयुक्तांनी स्पष्ट केले.
या घटनेनंतर महिलांच्या सुरक्षेवर गंभीर प्रश्नचिन्ह?
या भयंकर घटनेनंतर शहरातील महिलांच्या सुरक्षेचा प्रश्न पुन्हा ऐरणीवर आला आहे. सार्वजनिक ठिकाणी अशा घटना घडणे म्हणजे कायदा-सुव्यवस्थेच्या दृष्टीने मोठी धोक्याची घंटा आहे. त्यामुळे पोलिस आणि प्रशासनाने आता कठोर पावले उचलण्याची गरज निर्माण झाली आहे.
