पुणे जिल्ह्यातील लोणी काळभोर पोलीस ठाण्यात नोंद असलेल्या एका धक्कादायक खून प्रकरणात न्यायालयाने आरोपीस जन्मठेपेची शिक्षा सुनावली आहे. सचिन अंबादास खोत (वय 27, रा. उरुळी कांचन, ता. हवेली, जि. पुणे) या व्यक्तीने आपल्या वडिलांची निर्दयपणे हत्या केली होती. न्यायालयाने या प्रकरणाची गंभीर दखल घेत आरोपीला भारतीय दंड संहिता कलम 302 नुसार जन्मठेप आणि 25,000 रुपये दंडाची शिक्षा ठोठावली आहे. दंड न भरल्यास अतिरिक्त तीन महिने सश्रम कारावासाची शिक्षा भोगावी लागणार आहे.
🔹 कसा घडला होता हा थरारक प्रकार?
ही घटना 29 ऑक्टोबर 2014 रोजी घडली. आरोपी सचिन खोत याला आपल्या वडिलांचे वर्तन खटकत होते. मयत अंबादास खोत (वय 52) हे नेहमी आपल्या सुनेच्या म्हणजेच आरोपीच्या पत्नीच्या नजरेत वाईट वर्तन करत होते. अनेकदा ते तिच्यासोबत अयोग्य वर्तन करत असल्याचे आरोपीच्या लक्षात आले होते.
त्या रात्री जेवणाच्या वेळी वडील अंबादास खोत यांनी “तु शेतात पाणी द्यायला जा, मी तुझ्या पत्नीसोबत झोपतो” असे वक्तव्य केले. हे ऐकताच संतप्त झालेल्या सचिन खोतने उस तोडण्याच्या लोखंडी कोयत्याने वडिलांवर सपासप वार करून त्यांचा जागीच खून केला.
🔹 पोलीस तपास आणि न्यायालयीन कार्यवाही
ही घटना घडल्यानंतर लोणी काळभोर पोलीस ठाण्यात गुन्हा क्रमांक 399/2014, भादंवि कलम 302 अंतर्गत गुन्हा नोंदवण्यात आला. सहायक पोलीस निरीक्षक रणजितसिंग यांनी अत्यंत सखोल तपास करून सबळ पुराव्यांच्या आधारे आरोपीविरुद्ध न्यायालयात दोषारोपपत्र दाखल केले.
हा खटला सेशन केस क्रमांक 109/2015 म्हणून पुणे जिल्हा सत्र न्यायालयात चालू होता. अतिरिक्त सरकारी वकील नामदेव तरळगट्टी यांनी सरकार पक्षाची बाजू प्रभावीपणे मांडली.
🔹 न्यायालयाचा ऐतिहासिक निर्णय
पुणे जिल्हा व सत्र न्यायाधीश मा. पी. पी. जाधव यांनी सर्व पुरावे आणि साक्षीदारांच्या जबानीनंतर आरोपीला दोषी ठरवत जन्मठेपेची शिक्षा सुनावली.
🔹 पोलिसांच्या मेहनतीला यश!
ही केस यशस्वीरीत्या न्यायालयात सिद्ध करण्यासाठी मा. अपर पोलीस आयुक्त, पूर्व प्रादेशिक विभाग, श्री. मनोज पाटील, पोलीस उप आयुक्त, परिमंडळ 05, डॉ. राजकुमार शिंदे, सहाय्यक पोलीस आयुक्त (हडपसर विभाग) श्रीमती अनुराधा उदमले, वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली प्रभावी कोर्ट पेरवी करण्यात आली.
महिला पोलीस अंमलदार ललिता कानवडे यांनी नियोजनबद्ध पद्धतीने साक्षी पुरावे वेळेत न्यायालयात हजर केले. यामुळे आरोपीला कठोर शिक्षा मिळवण्यात पोलिसांना यश आले.
🔹 समाजासाठी धडा!
या घटनेतून एक महत्त्वाचा धडा घेतला पाहिजे – कौटुंबिक वाद कितीही तीव्र असले तरी कायदा हातात घेणे चुकीचे आहे. योग्य न्याय मिळवण्यासाठी कायद्याचा मार्ग अधिक प्रभावी ठरतो.
🔹 कायदा आणि सुव्यवस्थेसाठी पोलिसांचे अथक प्रयत्न सुरूच राहतील!
