महात्मा गांधी यांच्या पुण्यतिथीनिमित्त काँग्रेसच्या वतीने अभिवादन! पुण्यात मान्यवरांच्या उपस्थितीत कार्यक्रम संपन्न

पुणे, ३० जानेवारी २०२५ – राष्ट्रपिता महात्मा गांधी यांच्या ७७ व्या पुण्यतिथीनिमित्त पुणे शहरात काँग्रेस पक्षाच्या वतीने अभिवादन कार्यक्रमाचे आयोजन करण्यात आले. सत्य, अहिंसा आणि लोकशाही मूल्यांचे पालन करत भारताला स्वातंत्र्य मिळवून देणाऱ्या महात्मा गांधी यांच्या स्मृतींना आदरांजली अर्पण करण्यात आली.

या कार्यक्रमात महाराष्ट्र प्रदेश काँग्रेसचे उपाध्यक्ष मा.आ. मोहनदादा जोशी यांच्या हस्ते महात्मा गांधी यांच्या प्रतिमेला पुष्पहार अर्पण करून त्यांना आदरांजली वाहण्यात आली. तसेच, पुणे महानगरपालिकेचे आयुक्त डॉ. राजेंद्र भोसले आणि जेष्ठ कामगार नेते डॉक्टर बाबा आढाव यांनी देखील पुष्पहार अर्पण करून गांधीजींना श्रद्धांजली वाहिली.

गांधीजींच्या विचारांची आठवण – सत्य आणि अहिंसेचा संदेश

या कार्यक्रमात बोलताना मा.आ. मोहनदादा जोशी यांनी गांधीजींच्या विचारांचे आजच्या काळातील महत्त्व अधोरेखित केले. त्यांनी सांगितले की, “गांधीजींनी अहिंसा आणि सत्याच्या मार्गाने देशाला स्वातंत्र्य मिळवून दिले. आजही त्यांचे विचार मार्गदर्शक आहेत. समाजातील वाढती हिंसा, द्वेष आणि असहिष्णुता यावर गांधी विचारांचा प्रभाव वाढवणे आवश्यक आहे.”

काँग्रेस नेत्यांची मोठी उपस्थिती – गांधी विचारांना चालना देण्याचा निर्धार

या कार्यक्रमाला काँग्रेसच्या अनेक प्रमुख नेत्यांची उपस्थिती होती. काँग्रेस नेते दत्ताजी बहिरट पाटील, शहर उपाध्यक्ष सुनिल मलके, महाराष्ट्र प्रदेश काँग्रेस सरचिटणीस सोशल मीडिया विभाग सुरेश कांबळे, माजी ओबीसी पुणे शहराध्यक्ष प्रशांत सुरसे, माजी नगरसेवक आयुब पठाण, पुणे शहर युवक काँग्रेस शहराध्यक्ष सौरभ अमराळे, प्रदेश युवक काँग्रेसचे सरचिटणीस रोहन सुरवसे पाटील, पुणे शहर सरचिटणीस चेतन अग्रवाल, चंद्रकांत चव्हाण, प्रशांत वेलणकर, संकेत गलांडे, प्रथमेश लबडे, विल्सन चंडेलवाल, अक्षय मोरे, महाराष्ट्र प्रदेश महिला काँग्रेस चिटणीस स्वाती शिंदे, अनिता मकवानी, अनिता धिमधिमे, ज्योती चंदेवळ, दुर्गा शुक्रे आदी मान्यवर या प्रसंगी उपस्थित होते.

गांधी विचारधारेचा प्रसार करण्याची आवश्यकता – डॉ. बाबा आढाव

कार्यक्रमात बोलताना ज्येष्ठ कामगार नेते डॉ. बाबा आढाव यांनी सांगितले की, “महात्मा गांधींनी संपूर्ण जीवन सत्य आणि अहिंसेच्या तत्त्वांना समर्पित केले. आज समाजात दंगली, जातीय तेढ आणि द्वेषाची भावना वाढताना दिसत आहे. अशा परिस्थितीत गांधी विचारधारा आणि त्यांचा मार्ग समाजाच्या प्रत्येक स्तरावर पोहोचवणे महत्त्वाचे आहे.”

महात्मा गांधींच्या पुण्यतिथीचे औचित्य साधून जनजागृती अभियान

पुणे काँग्रेसतर्फे महात्मा गांधींच्या पुण्यतिथीनिमित्त ‘गांधी विचार जनजागृती अभियान’ राबविण्याचा निर्णय घेण्यात आला आहे. युवक आणि नागरिकांमध्ये गांधीजींच्या शिकवणीबाबत जागृती करण्यासाठी विविध कार्यक्रमांचे आयोजन केले जाणार आहे.