मोटारसायकल चोरीचे तीन गुन्हे उघड; दोन तरुण आरोपींच्या मुसक्या आवळल्या

पुणे: शहरातील दुचाकी चोरीच्या घटनांमध्ये वाढ होत असतानाच कोथरुड पोलिसांनी मोठी कारवाई करत तीन मोटारसायकल चोरीचे गुन्हे उघडकीस आणले आहेत. गोपनीय माहितीच्या आधारे केलेल्या या कारवाईत दोन आरोपींना अटक करण्यात आली असून, त्यांच्या ताब्यातून एकूण ८४,००० रुपये किमतीच्या तीन दुचाकी हस्तगत करण्यात आल्या आहेत.

संशयास्पद हालचालींवरून पोलिसांचा सापळा

कोथरुड पोलीस ठाणे हद्दीत दत्त मंदिरासमोरून अज्ञात चोरट्यांनी मोपेड चोरी केल्याची तक्रार दाखल झाली होती. यानंतर वरिष्ठ पोलीस निरीक्षक संदीप देशमाने यांच्या मार्गदर्शनाखाली शास्त्रीनगर पोलिस चौकीच्या पथकाने संशयितांचा शोध सुरू केला.

दि. २३ मार्च २०२५ रोजी पोलीस उपनिरीक्षक मोहन चव्हाण, पोलीस अमंलदार योगेश सुळ आणि हनुमंत माळी हे गस्त घालत असताना गोपनीय बातमीदारामार्फत माहिती मिळाली की, मेघसृष्टी, गोपीनाथ नगर, कोथरुड येथे दोन अनोळखी तरुण काळ्या रंगाच्या, नंबर प्लेट नसलेल्या अॅक्टीव्हा स्कूटरवर संशयास्पदरीत्या फिरत आहेत.

तत्काळ कारवाई करत पोलीस पथकाने त्या ठिकाणी धाव घेतली आणि संशयित तरुणांना ताब्यात घेतले. विचारपूस केली असता त्यांनी उडवाउडवीची उत्तरे दिली. पोलिसांनी अधिक विश्वासात घेतल्यावर त्यांनी ही स्कूटर भारती विद्यापीठ, कात्रज येथून चोरल्याची कबुली दिली.

तीन दुचाकी चोरीची कबुली, पोलिसांनी पकडले रंगेहाथ

तपासाच्या पुढील टप्प्यात आरोपींनी अजून दोन मोटारसायकली चोरी केल्याची कबुली दिली.
गुन्ह्यांचा तपशील:
कोथरुड पोलीस ठाणे गु.र.नं. ८४/२०२५
लोणी काळभोर पोलीस ठाणे गु.र.नं. १२६/२०२५
भारती विद्यापीठ पोलीस ठाणे गु.र.नं. १७६/२०२५

या तिन्ही ठिकाणी चोरी झालेल्या दुचाकी पोलिसांनी जप्त केल्या असून, एकूण ८४,००० रुपये किमतीच्या वाहनांचा समावेश आहे.

अटक आरोपींची माहिती:

आकाश सुरेश वाघिरे (वय २१ वर्षे) – रा. शिवाजीनगर, पुणे
आदित्य भारत जाधव (वय २१ वर्षे) – रा. चंदननगर, खराडी, पुणे

वरिष्ठ अधिकाऱ्यांचे मार्गदर्शन आणि यशस्वी कारवाई

ही यशस्वी कारवाई मा. अपर पोलीस आयुक्त प्रविणकुमार पाटील, पोलीस उपआयुक्त परि-३ संभाजी कदम, सहा. पोलीस आयुक्त भाऊसाहेब पठारे यांच्या मार्गदर्शनाखाली पार पडली.

कारवाईतील प्रमुख अधिकारी आणि पोलीस पथक:
वरिष्ठ पोलीस निरीक्षक – संदीप देशमाने
सहा. पोलीस निरीक्षक – रविंद्र आळेकर
पोलीस उपनिरीक्षक – मोहन चव्हाण
पोलीस उपनिरीक्षक – बसवराज माळी
पोलीस अमंलदार – योगेश सुळ, हनुमंत माळी

पुढील तपास सुरू

आरोपींनी आणखी काही गुन्हे केले आहेत का, याचा तपास पोलिस करत आहेत. पुण्यातील वाढत्या दुचाकी चोरीच्या घटनांवर अंकुश आणण्यासाठी पोलीस अधिक सतर्क झाले असून, वाहनधारकांनीही आपल्या वाहनांना लॉक लावणे, सीसीटीव्ही बसवणे यांसारख्या उपाययोजना कराव्यात, असे आवाहन करण्यात आले आहे.