भारताच्या भालाफेकपटू नीरज चोप्राने 2024 डायमंड लीग फायनलमध्ये दुसरे स्थान पटकावले आहे. ब्रसेल्स येथील किंग बौडौइन स्टेडियममध्ये झालेल्या या स्पर्धेत ग्रेनेडाच्या अँडरसन पीटर्सने 87.87 मीटरच्या सर्वोत्तम भालाफेकीसह प्रथम स्थान मिळवले, तर नीरजची सर्वोत्तम फेक 87.86 मीटरवर राहिली, जी अवघ्या 1 सेंटीमीटरने कमी होती.
या स्पर्धेत तिसऱ्या स्थानावर जर्मनीच्या जुलियन वेबरने 85.97 मीटरची फेक करत बाजी मारली. विशेष म्हणजे, गेल्या वर्षीच्या विजेत्या जकुब वॅडलिज आणि ऑलिम्पिक विजेता अर्शद नदीम यांनी या स्पर्धेत भाग घेतला नाही. नीरज चोप्राने सलग दुसऱ्या वर्षी डायमंड लीग फायनलमध्ये उपविजेतेपद मिळवले. 2023 मध्येही तो जकुब वॅडलिजकडून 83.80 मीटर फेक करून पिछाडीवर राहिला होता. यावेळी नीरजने आपली कामगिरी सुधारली, परंतु तरीही विजय अवघ्या काही अंतराने हुकला.
स्पर्धेच्या पहिल्याच फेकीत अँडरसन पीटर्सने 87.87 मीटरची फेक करून आघाडी घेतली होती, तर नीरजने 86.82 मीटर फेक करत दुसऱ्या स्थानावर राहत स्पर्धा सुरू केली. त्याच्या तिसऱ्या प्रयत्नात 87.86 मीटरचा मेगाफेक केला. मात्र, नंतरच्या प्रयत्नांमध्ये तो 83.30 मीटर आणि 86.46 मीटरपर्यंतच पोहोचू शकला.
नीरजला यंदाच्या हंगामात त्रास देणाऱ्या कंबर व ग्रोइन दुखापतीमुळे त्याने फार ताण देत खेळणे टाळले. हंगाम संपल्यानंतर डॉक्टरांच्या सल्ल्यानुसार शस्त्रक्रियेची आवश्यकता आहे का, हे तो ठरवणार आहे.
नीरज चोप्रासाठी 2024 हंगाम यशस्वी ठरला असून, त्याने पॅरिस ऑलिम्पिकमध्ये रौप्यपदक जिंकले होते. मात्र, त्याने या स्पर्धेत आपली सर्वोत्तम कामगिरी साध्य करू शकली नाही.
