सातारा: पुणे-बंगळूर महामार्गावर बुधवारी (दि. १४) सायंकाळी सुमारे ६ वाजता एक भयंकर अपघात घडला. या अपघातात दुचाकीला एस.टी. बसने जोरदार धडक दिली, ज्यामुळे दुचाकीने पेट घेतला आणि त्याचवेळी एस.टी. बसही आगीच्या भक्ष्यस्थानी पडली. या अपघातात दुचाकीस्वाराचा होरपळून मृत्यू झाला आहे, परंतु प्रसंगावधान राखत मदतकार्य पोहोचल्यामुळे एस.टी. बसमधील ३५ प्रवाशांना सुखरूप बाहेर काढण्यात यश आले आहे.
हा अपघात साताऱ्यातील भुईंज-पाचवड दरम्यान महामार्गावर हॉटेल विरंगुळासमोर घडला. पुण्याकडून साताऱ्याकडे जाणाऱ्या एका कार चालकाने अचानक ब्रेक दाबल्यामुळे मागून येणाऱ्या दुचाकीवर एस.टी. बसने (MH 40 AQ 6303) जोरदार धडक दिली. या धडकेमुळे दुचाकीने तात्काळ पेट घेतला, आणि त्याचवेळी एस.टी. बसनेही आगीचा तडाखा घेतला.
भुईंज पोलीस ठाण्याचे सहायक पोलीस निरीक्षक रमेश गर्जे यांचे नेतृत्वात पोलीस घटनास्थळी दाखल झाले. किसनवीर कारखाना आणि वाई नगरपालिकेच्या अग्निशमन दलाने आग आटोक्यात आणली. अपघातामुळे साताऱ्याकडे जाणारी वाहतूक काही काळासाठी ठप्प झाली होती.
मृत दुचाकीस्वाराची ओळख पटवण्याचे काम रात्री उशीरापर्यंत सुरू होते. तपासानंतर दुचाकी यामाहा कंपनीची असून ती स्वप्नील शरद डुबल (रा. वडवली, ता. कराड, जि. सातारा) यांच्या नावावर असल्याचे स्पष्ट झाले आहे.
